ट्रॅक्टरचे टायर फुटून तरूणाचा मृत्यू

लोहोणेर : - येथील ट्रॅक्टर चालक युवक कैलास तुकाराम आहिरे (३०) हा पिपळगाव ( ब ) येथील कांदा मार्केटमध्ये कांदा विक्र ीसाठी गेला असता टॅक्टरच्या ट्रॉलीचे चाक खोलात असतांना अचानक टायर फुटल्याने झालेल्या अपघातात जबर मार लागल्याने जागीच गतप्राण झाला. याबाबत पिपळगाव पोलिसात गुन्हा दाखल करण्यात आला असून पुढील तपास करण्यात येत आहे. . कैलास तुकाराम आहिरे युवक बुधवारी दुपारी पिपळगाव ( ब. ) येथील कांदा मार्केटमध्ये कांदा विक्र ीसाठी जात असताना त्याच्या सोबत कांदा विक्र ीस जात असलेल्या रघुनाथ बागुल यांच्या ट्रॅक्टर मध्ये बिघाड झाल्याचे त्यांच्या लक्षात आले सदरचे ट्रॅक्टर कैलासने मार्केट पर्यत चालवत नेले. तेथे सदर ट्रॅक्टरचे टायर खोलात असतांना अचानक अपघात झाल्याने कैलास यास जबर मार लागल्याने तो जागीच मरण पावला. तर रघुनाथ बागुल यास हात पायास मार लागला असून त्यास नाशिक येथील रु ग्णालयात उपचारासाठी दाखल करण्यात आले आहे. कैलास हा येथील प्रगतीशील शेतकरी तुकाराम बारकू आहिरे यांचा एकुलता एक मुलगा होता. त्यांच्या पश्चात आई, वडील, पत्नी, एक मुलगा, एक मुलगी असा परिवार आहे. पिपळगाव येथील शासकीय रु ग्णालयात शवविच्छेदना नंतर बुधवारी रात्री उशिरा त्याच्यावर लोहोणेर येथील अमरधाम मध्ये अत्यंत शोकाकुल वातावरणात अंत्यसंस्कार करण्यात आले.