माथेफिरूकडून दुचाकींचे नुकसान

सातपूर : दहशत निर्माण करण्याचा प्रयत्न करणाऱ्यास अटक

 सातपूर : सातपूर कॉलनीतील चारचाकी वाहनांची तोडफोड केल्याच्या घटनेस तीन दिवस लोटत नाही तोच पुन्हा स्वारबाबा नगरात पाच दुचाकीचे नुकसान केल्याची वार्ता शहरात पसरल्याने अनेक तर्क वितर्क लावण्यात येत होते, परंतु पोलिसांनी वेळीच धाव घेऊन या घटनेची खातर जमा केली असता एका माथेफिरुने दुचाकींचे सीटकव्हर फाडल्याचे समोर आले़ सातपूर पोलिसांनी या माथेफिरूस अटक केली आहे.सातपूर कॉलनीत काही समाजकंटकांनी बुधवारी (दि़१७) चार चाकी वाहनांच्या काचा फोडून दहशत निर्माण करण्याचा प्रयत्न केल्याने या परिसरात घबराटीचे वातावरण आहे. या घटनेला तीन दिवस उलटूनही पोलिसांना अद्यापपावेतो संशयितांचा शोध लागलेला नाही़ त्यातच शनिवारी (दि़२०) पुन्हा स्वारबाबानगरमधील सोमेश्वर गल्लीत पाच दुचाकींचे नुकसान केल्याची वार्ता सकाळी सोशल मीडियावर व्हायरल झाली.या दुचाकींचे नकुसान केल्याचे वृत्त शहरात पसरल्याने पुन्हा घबराटीचे वातावरण निर्माण झाले आहे़ दरम्यान, या घटनेने पोलीस अधिकारी खडबडून जागे झाले आणि त्यांनी घटनास्थळी भेट दिली. त्यावेळी चार - पाच दुचाकी वाहनांचे सीट कव्हर फाडण्यात आल्याचे समोर आले़ या प्रकरणी पोलिसांनी नीलेश शार्दूल या माथेफिरूस ताब्यात घेतले आहे. (वार्ताहर)