वणीत बिबट्यासह दोन बछड्यांना पिटाळले

वणीत बिबट्यासह दोन बछड्यांना पिटाळले

वणी : मध्य रात्रीच्या सुमारास गायींवर हल्ला करण्याच्या प्रयत्नात असणाऱ्या बिबट्या व त्याच्या दोन बछड्यांना प्रसंगावधान राखून जीव धोक्यात घालून पिटाळले. मात्र बिबट्याच्या वास्तव्याने परिसरात भी तिचे वातावरण आहे. वणी-कळवण रस्त्यावर गणेश यशवंतराव देशमुख यांची शेतजमीन असून, घरालगत गुरांचा गोठा आहे. त्यात गायी बांधलेल्या स्थितीत असताना रात्री दोन वाजून तीस मिनिटांच्या सुमारास बिबट्या व त्याच्या दोन बछड्यांनी गोठ्यात प्रवेश केला याची चाहूल गायींना लागल्याने त्यांनी हंबरणे सुरू केले. त्या आवाजाने जागे झालेल्या गणेश देशमुख व रणजित देशमुख यांनी लाठ्या-काठ्या घेत गोठ्याकडे धाव घेतली बिबट्या व त्याच्या बछड्यांना पाहिले. नंतर पत्र्याच्या शेडवर दगडफेक करून लाठ्यांचा आवाज केला. प्रारंभी बिबट्या त्यांच्यावर गूरगूरला, मात्र हिमतीने देशमुख कुटुंबीयांनी बिबट्या व त्याच्या बछड्यांना पळवून लावले रविवारी सकाळी वन विभागाला ही माहिती देण्यात आली. याची दखल घेऊन पुढील कार्यवाही करणार असल्याची माहिती वन परिक्षेत्र अधिकारी वाडेकर यांनी दिली. (वार्ताहर)