नाशिक रोडला युवकावर कोयत्याने हल्ला

पोलिसांनी दिलेल्या माहितीनुसार, मालधक्का रोड, रमाबाई आंबेडकरनगर येथील युवक प्रतीक किशोर गांगुर्डे (२१) याने फिर्याद दिली आहे. त्यानुसार तो रविवारी रात्री साडेसात वाजेच्या सुमारास गौतम छात्रालय येथे उभा असताना डेविड गायकवाड यांच्यासोबत झालेल्या जुन्या भांडणाची कुरापत काढून किरण बुथवेल गायकवाड (२१, रा. रमाबाई आंबेडकरनगर, गुलाबवाडी, देवळाली गाव), श्याम गोविंद कसबे (२१), रोहित दाविन पाटोळे (१९) व डेविड गायकवाड यांनी प्रतीकसोबत वाद घालून शिवीगाळ व मारहाण करण्यास सुरुवात केली. यावेळी किरण गायकवाड याने प्रतीकच्या डोक्यात कोयत्याने वार करून जखमी केले. तसेच हातावर व पायावर उलटा कोयता मारून गंभीर जखमी केले. याप्रकरणी पोलिसांनी तिघा जणांना अटक केली असून त्यांच्याविरोधात नाशिक रोड पोलीस ठाण्यात गुन्हा दाखल करण्यात आला आहे, तर चौथा संशयित डेविड गायकवाड अजूनही फरार असून, पोलीस त्याचा शोध घेत आहेत. दरम्यान, गेल्या काही दिवसात नाशिक रोड परिसरामध्ये मारामारीच्या घटनेत कोयते वापरण्याचे प्रमाण वाढले असून, पोलिसांनी कठोर कारवाई करण्याची गरज या भागातील नागरिकांकडून व्यक्त होत आहे.