Sanjay Raut: क्रांतिकारी भाषण, वेगळ्या राहुल गांधींचा साक्षात्कार देशाला झाला; संजय राऊतांची स्तुतिसुमनं

काँग्रेस नेते राहुल गांधी यांनी काल लोकसभेत केलेल्या भाषणाचं खासदार संजय राऊत यांनी तोंडभरुन कौतुक केलं आहे.

नवी दिल्ली-

काँग्रेस नेते राहुल गांधी यांनी काल लोकसभेत केलेल्या भाषणाचं खासदार संजय राऊत यांनी तोंडभरुन कौतुक केलं आहे. काल लोकसभेत वेगळ्या राहुल गांधींचा साक्षात्कार देशाला झाला, त्यांनी केलेलं भाषण क्रांतिकारी होतं, असं संजय राऊत म्हणाले. ते नवी दिल्लीत आयोजित पत्रकार परिषदेत बोलत होते.

राहुल गांधी यांनी काल लोकसभेत राष्ट्रपतींच्या अभिभाषणावर आपली प्रतिक्रिया देताना मोदी आणि अदानींच्या नात्यावर भाष्य करत जोरदार हल्ला चढवला. मोदी आणि अदानींचं नेमकं नातं काय? हे आता देशाला कळायला हवं असं राहुल गांधी म्हणाले. तसंच राहुल यांनी मोदी आणि अदानी यांच्या एकत्र विमान प्रवासाचे काही फोटो देखील संसदेत सादर केले. याशिवाय २०१४ साली श्रीमंतांच्या यादीत ६०९ व्या स्थानी असलेले अदानी काही वर्षात थेट दुसऱ्या स्थानापर्यंत पोहोचले त्याबद्दल त्यांचं कौतुकच करायला हवं, असा टोला राहुल यांनी लगावला. 

राहुल गांधींच्या भाषणाचं कौतुक करताना संजय राऊत यांनी क्रांतिकारी भाषण अशी उपमा दिली आहे. "काल संसदेत एका वेगळ्या राहुल गांधींचा साक्षात्कार देशाला झाला. त्यांनी ज्याप्रकारे संपूर्ण विषयाची मांडणी केली ते नक्कीच लक्षवेधी आहे. त्यांच्यापुढे सत्ताधारी आणि भाजपासुद्धा फार आवाज करू शकले नाहीत. राहुल गांधी यांचं कालचं भाषण क्रांतिकारीच होतं. कारण सत्य बोलणं हे क्रांतिकारी काम असतं. तशी हिंमत लागते आणि राहुल गांधी ती हिंमत दाखवत आहेत", असं संजय राऊत म्हणाले.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"