नवी दिल्ली : बनावट राष्ट्रवादींना ओळखा, देश तुमच्यासोबत आहे, असे आवाहन काँग्रेसच्या सरचिटणीस प्रियांका गांधी यांनी आंदोलकांना केले. अग्निपथ योजनेला शांततेत विरोध करणाऱ्या लोकांना आमच्या पक्षाचे पूर्ण समर्थन असल्याचेही त्यांनी सांगितले. अग्निपथ योजनेला विरोध करत असलेल्या तरुणांना समर्थन देण्यासाठी काँग्रेसचे संसद सदस्य, नेते येथे जंतर- मंतरवर सत्याग्रह करत आहेत. यावेळी प्रियांका गांधी म्हणाल्या की, आपल्यापेक्षा मोठा देशभक्त कोणीही नाही. मी आपल्याला सांगू इच्छिते की, आपण डोळे उघडून नीट पाहा. बनावट राष्ट्रवादी व बनावट देशभक्तांना ओळखा. पूर्ण देश आणि काँग्रेस आपल्या संघर्षात आपल्यासोबत आहे.
‘बेरोजगारीच्या अग्निपथवरून चालण्यास भाग पाडले’पंतप्रधान नरेंद्र मोदी यांनी तरुणांना नोकरीची वारंवार खोटी आशा दाखवून या युवकांना बेरोजगारीच्या अग्निपथवर चालण्यासाठी भाग पाडले, अशा शब्दांत काँग्रेसचे नेते राहुल गांधी यांनी या योजनेवरून पुन्हा हल्लाबोल केला. राहुल गांधी म्हणाले की, आठ वर्षांत १६ कोटी नोकऱ्या देण्यात येणार होत्या, पण तरुणांना केवळ पकोडे तळण्याचेच ज्ञान मिळाले. राहुल गांधी यांनी रविवारी आपला वाढदिवस साजरा न करण्याचे आवाहन केले होते.