एका कुटुंबाने मुलीच्या जन्माचा आनंद हा अत्यंत अनोख्या पद्धतीने साजरा केला आहे. भाजपा कार्यकर्त्याने मुलगी झाल्याचा आनंद पाणीपुरी वाटून साजरा केल्याची घटना समोर आली आहे. मध्य प्रदेशमधीलभाजपा कार्यकर्त्याने तब्बल एक लाख पाणीपुरीचं मोफत वाटप केले आहे. त्याच्या या अनोख्या सेलिब्रेशनची सध्या सर्वत्र जोरदार चर्चा रंगली आहे. अंचल गुप्ता असं या भाजपा कार्यकर्त्याचं नाव आहे. गुप्ता यांनी मुलगी झाल्याच्या आनंदात तब्बल एक लाख पाणीपुरी लोकांना मोफत वाटल्या.
मिळालेल्या माहितीनुसार, भोपाळमध्ये राहाणारे अंचल गुप्ता हे भाजपाचे कार्यकर्ते असून त्यांचे मुखर्जी नगरात गुप्ता चाट भंडार नावाचे दुकान आहे. अंचल यांनी मुलीचे नाव अनोखी असं ठेवलं असून अनोख्या पद्धतीने तिच्या जन्माचा साजरा केला. गुप्ता यांनी मुलीच्या पहिल्या वाढदिवसानिमित्त एका बर्थ डे पार्टीचे आयोजन केले होते. या पार्टीतच गुप्ता यांनी पाणीपुरीचा एक स्टॉल लावला होता.
गुप्ता यांनी या स्टॉलवर स्वत: लोकांना पाणीपुरी खायला दिली. मोफत पाणीपुरी खाण्यासाठी मोठी गर्दी करण्यात आली होती. रामेश्वर शर्मा नावाच्या एका व्यक्तीने अंचल यांच्या या अनोख्या पाणीपुरी सेलिब्रेशनचा व्हिडिओ ट्विटरवर शेअर केला आहे. पंतप्रधान नरेंद्र मोदी आणि मध्य प्रदेशचे मुख्यमंत्री शिवराज सिंह चौहान महिला सक्षमीकरणाची मोहीम राबवत आहेत.
मोहिम यशस्वी करण्यात अंचल गुप्तासारख्या वडिलांचा अनोखा सहभाग निश्चितच आदर्श ठरवणार असा असल्याचे कॅप्शन रामेश्वर यांनी या व्हिडिओला दिलं आहे. मध्य प्रदेशचे मुख्यमंत्री शिवराज सिंह चौहान यांनी हा व्हिडीओ रिट्विट केला आहे. तसेच अनोखीला वाढ दिवसाच्या शुभेच्छा दिल्या आहेत. नेहमी आनंदी, सुखी राहा असं म्हणत चौहान यांनी अनोखीला उज्ज्वल भविष्यासाठी शुभेच्छा दिल्या आहेत. एका हिंदी वेबसाईटने याबाबतचे वृत्त दिले आहे.