हिमाचलमधील संकट टळले; जनादेश वाचवण्यासाठी कठोर निर्णय घेण्याची काँग्रेसने केली तयारी

हिमाचल प्रदेशातील एकमेव जागेसाठी झालेल्या राज्यसभेच्या निवडणुकीत काँग्रेसच्या सहा आमदारांनी मंगळवारी क्रॉस व्होटिंग केल्याने हे संकट निर्माण झाले आहे.

लोकमत न्यूज नेटवर्क
शिमला, नवी दिल्ली : मुख्यमंत्र्यांवर नाराज मंत्री विक्रमादित्य सिंह यांनी बुधवारी तडकाफडकी राजीनामा दिल्यामुळे उत्तर भारतातील काँग्रेसची सत्ता असलेल्या हिमाचल प्रदेशातील राजकीय संकट अधिक गहिरे झाले होते. मात्र विक्रमादित्य सिंह  यांनी राजीनामा मागे घेतल्याने राज्यातील राजकीय तणाव कमी होण्याची चिन्हे आहेत.  पक्षश्रेष्ठींनी दोन निरीक्षकांना राज्याच्या दौऱ्यावर पाठवले असून जनादेश वाचवण्यासाठी कठोर निर्णय घेतले जातील, असे काँग्रेसने म्हटले आहे. दरम्यान, हिमाचलच्या विधानसभेत अध्यक्षांनी भाजपचे १५ आमदार निलंबित केले आहेत.

  हिमाचल प्रदेशातील एकमेव जागेसाठी झालेल्या राज्यसभेच्या निवडणुकीत काँग्रेसच्या सहा आमदारांनी मंगळवारी क्रॉस व्होटिंग केल्याने हे संकट निर्माण झाले आहे. दरम्यान, राज्यसभा निवडणुकीत क्रॉस व्होटिंग केल्यानंतर हरयाणाच्या पंचकुला येथे रवाना झालेले सहा आमदार बुधवारी शिमल्यात परतले. त्यात तीन अपक्ष आमदारांचाही समावेश होता.

विधानसभेत बुधवारी अर्थसंकल्प मंजूर करताना गोंधळ झाला. अध्यक्ष पठानिया यांनी जयराम ठाकूर यांच्यासह भाजपच्या १५ आमदारांना निलंबित केले.  काँग्रेसने राज्य विधानसभेत आपले बहुमत गमावले आहे, अशी भूमिका घेत भाजपने अर्थसंकल्पावर मतदानाची मागणी केली होती. परंतु, दुपारी भाजपचा एकही सदस्य उपस्थित नसताना वित्त विधेयक आवाजी मतदानाने मंजूर झाल्याने हे संकट तूर्तास टळले.

जनादेशाचा विश्वासघात होऊ देणार नाही
n‘काँग्रेस कठोर पावले उचलण्यास मागेपुढे पाहणार नाही कारण पक्षाला आमचे प्राधान्य आहे. सरकार असे पडत नाही. जनतेने आम्हाला जनादेश दिला आहे. 
n‘तो माघारी घेण्याचा अधिकार जनतेला आहे. हिमाचल प्रदेशात जनादेशाचा विश्वासघात होऊ देणार नाही,’ असे काँग्रेसचे सरचिटणीस जयराम रमेश यांनी यावेळी सांगितले.

पाच वर्षे सरकार चालवणार
पक्ष श्रेष्ठींनी मला किंवा इतर कोणालाही राजीनामा मागितला नाही. राज्यातील भाजप नेत्यांनी ज्या प्रकारचे काम केले, त्यांना आपल्याच लोकांवर विश्वास नाही. सीआरपीएफ तैनात करण्यात आले. हरयाणा पोलिस तैनात करण्यात आले. हेलिकॉप्टरचा वापर करण्यात आला. पण, हिमाचलची जनता आमच्यासोबत आहे. आमदार आमच्यासोबत आहेत. आम्ही नक्कीच हिमाचलचे सरकार पाच वर्षे चालवू. 
- सुखविंदर सिंह सुखू, मुख्यमंत्री

भाजपला जनादेश चिरडायचा आहे 
भाजपला राज्याला राजकीय संकटात ढकलायचे आहे. २५ आमदार असलेला भाजप जर ४३ आमदारांच्या बहुमताच्या सरकारला पाडण्याचा प्रयत्न करत असेल तर त्यांना जनतेचा अधिकार ठेचायचा असल्याचे दिसून येते. भाजप पैशाची ताकद, यंत्रणांची ताकद आणि केंद्रातील सत्तेचा गैरवापर करत आहे.
- प्रियांका गांधी, सरचिटणीस, काँग्रेस