दिल्लीत सरकारी इमारतीला आग

दक्षिण दिल्लीतील सीजीओ संकुलात असलेल्या सामाजिक न्याय मंत्रालयाच्या कार्यालयात बुधवारी लागलेल्या आगीत केंद्रीय औद्योगिक सुरक्षा दलाच्या (सीआयएसएफ) उप-निरीक्षकाचा मृत्यू झाला

नवी दिल्ली : दक्षिण दिल्लीतील सीजीओ संकुलात असलेल्या सामाजिक न्याय मंत्रालयाच्या कार्यालयात बुधवारी लागलेल्या आगीत केंद्रीय औद्योगिक सुरक्षा दलाच्या (सीआयएसएफ) उप-निरीक्षकाचा मृत्यू झाला व अनेक महत्त्वाच्या फायली व दस्तावेज नष्ट झाल्याची भीती व्यक्त होत आहे.११ मजल्यांच्या पंडित दीनदयाळ अंत्योदय भवनच्या पाचव्या मजल्यावर ही आग लागली. सीआयएसएफचे उप-निरीक्षक एम. पी. गोदारा हे परिस्थितीची पाहणी करण्यासाठी गेले असताना विषारी वायुमुळे ते बेशुद्ध पडले. तेथून त्यांना एम्समध्ये नेण्यात आले. तेथे त्यांचा मृत्यू झाला, असे अधिकाऱ्याने सांगितले. संपूर्ण बी-१ विंगचा ८० टक्के भाग आगीत जळाला असून अनेक फायली व दस्तावेज नष्ट झाले आहेत.