गाझियाबाद - लग्नसोहळा म्हटलं की काहीतरी वेगळं करण्याचा नवदाम्पत्याचा प्रयत्न असतो. नवीन शक्कल लढवून आपला विवाहसोहळा खास आणि संस्मरणीय बनविण्यात येतो. अनेकदा मित्रांकडूनही मित्रांचे लग्न लक्षणीय बनविण्यात येते. मात्र, गाझियाबादमधील एका जोडप्याने आपल्या लग्नात चक्क हवेत गोळीबार केल्याची धक्कादायक घटना उघडकीस आली आहे. या घटनेचा व्हिडिओ आता सोशल मीडियातून समोर आला आहे.
गाझियाबादच्या घंटाघर पोलीस ठाणे हद्दीतील ही घटना असून नवरा-नवरीने स्टेजवरच हवेत गोळीबार केला आहे. 10 सकेंदाच्या या व्हिडिओची पोलिसांकडून चौकशी सुरू आहे. यापूर्वी इंदापूरम ठाणे हद्दीतील एका लग्नात अशाच प्रकारे लग्नसोहळ्यात गोळीबार केल्याचा व्हिडिओ समोर आला होता. त्यानंतर, पोलिसांनी लग्नसोहळ्यातील जागेच्या मालकांना यासंदर्भात नोटीस बजावल्या आहेत. तसेच, हर्ष फायरींग करण्यास मनाई असल्याचेही सांगण्यात आले. तरीही, घंटाघर येथे पुन्हा लग्नात नवरा-नवरीकडूनच गोळीबार करण्यात आला आहे.
गाझियाबादमधील या घटनेची सोशल मीडियासह घंटाघर परिसरात चांगलीच चर्चा होत आहे. तर, उत्तर प्रदेशात गुन्हेगारी प्रवृत्तीचा किती प्रभाव असल्याचेही चर्चिले जात आहे. त्यामुळे, पोलिसांकडून कायदेशीर कारवाई करण्याची प्रक्रिया सुरू आहे.