गोरक्षक दलाचा प्रमुख अटकेत

खंडणी वसुली आदी गंभीर गुन्हे दाखल असलेला गो रक्षक दलाचा प्रमुख सतीश कुमार याला वृंदावन येथे शनिवारी अटक करण्यात आली.

पतियाळा : अनैसर्गिक लैंगिक संबंध, दंगली घडविणे, खंडणी वसुली आदी गंभीर गुन्हे दाखल असलेला गो रक्षक दलाचा प्रमुख सतीश कुमार याला वृंदावन येथे शनिवारी अटक करण्यात आली. उप पोलीस अधीक्षक गुरमीत चौहान यांनी सतीश कुमारला अटक झाल्याच्या वृत्ताला रविवारी दुजोरा दिला परंतु तपशील दिला नाही. पोलीस सूत्रांनी दिलेल्या माहितीनुसार इजा करण्याच्या हेतुने अपहरण करणे, बेकायदेशीरपणे ताब्यात घेणे व भारतीय दंड संहितेच्या अन्य कलमांनुसार पंधरवड्यापूर्वी त्याच्यावर गुन्हे दाखल झाल्यापासून तो वृंदावन येथे लपून बसला होता. दोन वर्षांपूर्वी गो रक्षक दलाचे कार्यकर्ते लोकांना निर्घृणपणे मारहाण करीत असल्याचा व्हिडिओ सगळीकडे पसरल्यानंतर ६ आॅगस्ट २०१६ रोजी त्याच्यावर गुन्हा दाखल झाला. सहारनपूर येथील युवकाने सतीश कुमारच्या गुंडांनी माझे अपहरण करून माझ्यावर लैंगिक अत्याचार केल्याचा आरोप केल्यानंतर सतीश कुमारवर भादंविच्या कलम ३७७ अन्वये (अनैसर्गिक लैंगिक संबंध) गुन्हा दाखल करण्यात आला. उत्तर प्रदेशच्या आणखी एका रहिवाशाने सतीश कुमारने माझ्यावर लैंगिक अत्याचार केल्याचे चौकशी करणाऱ्यांना सांगितले.