नवी दिल्ली - स्वरसम्राज्ञी भारतरत्न लता मंगेशकर यांची आज जयंती असून विविध क्षेत्रातून लतादिदींच्या आठवणींना उजाळा मिळत आहे. मनसे प्रमुख राज ठाकरे आणि लता मंगेशकर यांचे संबंध खूप घनिष्ट होते. लतादिदींच्या जयंतीनिमित्त राज ठाकरेंनी पत्र लिहून त्यांच्या आठवणी जागवल्या आहेत. तर, पंतप्रधान नरेंद्र मोदींनीही लता दीदींच्या आठवणी जागवत अयोध्येत लता मंगेशकर चौकाचे लोकार्पण केले. विशेष म्हणजे हा चौक अयोध्येतील श्रीराम मंदिर आणि शरयू नदीपासून अगदी जवळ आहे.
लती मंगेशकर यांच्या जयंतीदिनी अनेक दिग्गजांनी त्यांच्या आठवणी जागवल्या आहेत. दीदी गेल्यापासून मी फारसं त्यांच्याबद्दल कुठे बोललो नाही, सार्वजनिक व्यासपीठावर तर नाहीच नाही असं राज ठाकरे म्हणाले. तर, बॉलिवूडमधील कलाकारांनीही लता दीदींच्या आठवणी जागवत विनम्र अभिवादन केले. पंतप्रधान नरेंद्र मोदींनी व्हिडिओ शेअर करत लता दीदींच्या स्मृती जागवल्या आहेत. तसेच, लता मंगेशकर चौकाचे लोकार्पण केल्याचेही सांगितले. अयोध्येतील श्रीराम मंदिरापासून नजीकच हा चौक आहे. त्यामुळे, लता दीदींच्या नावाने समर्पित करायाला या जागेशिवाय दुसरं काही चांगलं असणार, असेही मोदींनी म्हटले.