लोकांच्या व्यथा ऐकण्याऐवजी स्वत:च्याच वेदना ऐकवितात, प्रियांका गांधी यांची टीका

राज्यातील भाजप सरकार कोणाचाही आदर करत नाही असं प्रियंका गांधी म्हणाल्या.

धारवाड (कर्नाटक) - लोकांच्या व्यथा ऐकून घेण्याऐवजी त्यांनाच आपल्या वेदना ऐकविणारे नरेंद्र मोदी हे आपण आतापर्यंत पाहिलेले एकमेव पंतप्रधान आहेत, असा घणाघात काँग्रेसच्या सरचिटणीस प्रियांका गांधी यांनी शनिवारी येथे केला.

धारवाड जिल्ह्यातील नवलगुंद शहरात आयोजित एका जाहीर सभेत त्या बोलत होत्या. ‘‘मी इंदिरा गांधी यांच्यापासून राजीव गांधी, पी. व्ही. नरसिंह राव, अटल बिहारी वाजपेयी व मनमोहन सिंग आदी अनेक पंतप्रधान पाहिले आहेत. परंतु हे (मोदी) पहिले पंतप्रधान आहेत जे जनतेच्या व्यथा ऐकण्याऐवजी स्वत:च्या वेदना त्यांना ऐकवतात,’’ असे त्या म्हणाल्या. राज्यातील भाजप सरकार कोणाचाही आदर करत नाही. मग ते लोक असू देत नाही तर त्यांची मते किंवा त्यांची सत्ता असलेले राज्य. एवढेच नाही तर ते ज्येष्ठ नेते जगदीश शेट्टर आणि संपूर्ण लिंगायत समुदायाचाही आदर करत नाहीत, असा आरोप त्यांनी केला.