ना फोन उचलत ना ई-मेलला उत्तर; 300 कोटी जप्त केल्यावर काँग्रेस नेत्याचं मौन, राजकारण तापलं

धीरज साहू यांच्या घरातून आयकर विभागाने जप्त केलेल्या बेहिशेबी रोख रकमेची किंमत 300 कोटी रुपयांपर्यंत पोहोचण्याची शक्यता आहे.

ओडिशा आणि झारखंडमधील काँग्रेसचे राज्यसभा खासदार धीरज साहू यांच्या घरातून आयकर विभागाने जप्त केलेल्या बेहिशेबी रोख रकमेची किंमत 300 कोटी रुपयांपर्यंत पोहोचण्याची शक्यता आहे. शनिवारी याबाबत माहिती देताना अधिकृत सूत्रांनी सांगितले की, 6 डिसेंबरपासून सुरू झालेल्या छाप्यांमध्ये आतापर्यंत 250 कोटींहून अधिक रोकड मोजण्यात आली असून, आणखी रोख मोजणे बाकी आहे. कोणत्याही एजन्सीने केलेल्या एकाच कारवाईत काळ्या पैशाची ही आतापर्यंतची 'सर्वोच्च' वसुली आहे. ओडिशातील बौद्ध डिस्टिलरी प्रायव्हेट लिमिटेडच्या आवारातून बहुतांश रोकड जप्त करण्यात आली आहे.

पीटीआयने धीरज साहू यांना आयकर विभागाच्या कारवाईवर प्रतिक्रिया देण्यासाठी फोन केला. मात्र त्यांनी कोणतीही प्रतिक्रिया दिली नाही. पीटीआयने बौद्ध डिस्टिलरी ग्रुपला पाठवलेल्या ई-मेललाही प्रतिसाद मिळाला नाही. बोलंगीर जिल्ह्यातील कंपनीच्या आवारात ठेवलेल्या सुमारे 10 कॅबिनेटमधून सुमारे 230 कोटी रुपयांची रोकड जप्त करण्यात आली, तर उर्वरित रक्कम टिटलागड, संबलपूर आणि रांची येथील ठिकाणांवरून जप्त करण्यात आली. माहिती मिळाल्यानंतर कर अधिकाऱ्यांनी बौद्ध डिस्टिलरीच्या परिसराची झडती सुरू केली. रोख मोजणी आज संपेल अशी अपेक्षा आहे.

कपाटांशिवाय जवळपास 200 लहान-मोठ्या बॅग रोख रक्कम भरण्यासाठी वापरण्यात आल्या होत्या. मोजणीसाठी काही बॅग उघडणं अद्याप बाकी आहे. नोटा मोजण्याच्या प्रक्रियेला गती देण्यासाठी आयकर विभागाने जवळपास 40 लहान-मोठी मशीन्स तैनात केल्या आहेत. अधिक कर्मचाऱ्यांना घटनास्थळी पाचारण करण्यात आले आहे. जप्त केलेली रोकड राज्यातील सरकारी बँकांमध्ये पोहोचवण्यासाठी आयकर विभागाने अनेक वाहने तैनात केली आहेत. सूत्रांनी सांगितले की, आयकर विभागाचे 100 हून अधिक अधिकारी बोलंगीर जिल्ह्यात विविध ठिकाणी तैनात करण्यात आले आहेत.

कॉंग्रेस @INCIndia के राज्यसभा सांसद धीरज साहू दो कम्पनी बलदेव साहू व कंपनी तथा शिव प्रसाद साहू एंड संस जिनके यहाँ अभी तक 350 करोड़ की गिनती हो चुकी है के 20 प्रतिशत हिस्से के घोषित पार्टनर हैं, अघोषित,बेनामी तो जाँच से पता चलेगा ।उनके रॉंची व लोहरदगा आवास पर 20 करोड़ नगद व 150… pic.twitter.com/VSmkavTw5F

— Dr Nishikant Dubey (@nishikant_dubey) December 10, 2023

आयकर विभागाच्या पथकांनी रांची येथील धीरज साहूच्या आवारातून आणखी तीन बॅग जप्त केल्या आहेत, तर ओडिशाच्या भागात असलेल्या दारू कारखान्यांच्या देखभालीचे प्रभारी म्हणून नेमलेल्या बंटी साहूच्या घरातून सुमारे 19 बॅग जप्त करण्यात आल्या आहेत. छापे टाकले गेले. बंटी साहूच्या घरातून जप्त केलेली रक्कम 20 कोटींहून अधिक असण्याची शक्यता सूत्रांनी व्यक्त केली आहे. कालपर्यंत, 250 कोटींहून अधिक रोख रकमेची मोजणी पूर्ण झाली आणि ही रक्कम ओडिशातील सरकारी बँक शाखांमध्ये जमा करण्यात आली. 

या प्रकरणावरून राजकारणही तापलं आहे. गोड्डा येथील भाजपा खासदार निशिकांत दुबे यांनी आपल्या ट्विटर अकाऊंटवरून याबाबत ट्विट केलं आहे. धीरज साहू यांच्यावरून काँग्रेसवर निशाणा साधला आहे. "काँग्रेसचे राज्यसभा खासदार धीरज साहू हे बलदेव साहू अँड कंपनी आणि शिवप्रसाद साहू अँड सन्स या दोन कंपन्यांचे 20 टक्के भागीदारी असलेले घोषित भागीदार आहेत. आतापर्यंत या दोन कंपन्यांमध्ये 350 कोटी रुपये मोजले गेले आहेत. रांची आणि लोहरदगा या घरातून 20 कोटी रुपये रोख आणि 150 कोटी रुपयांचे सोने, चांदी आणि हिरे जप्त करण्यात आले आहेत. राहुल गांधींचा प्रवास हा भारत जोडो नसून भ्रष्टाचारी जोडो यात्रा होता" असं म्हटलं आहे.