हरयाणामध्ये खट्टर सरकारची परीक्षा

काँग्रेस, जननायक जनता पार्टीकडून तगडे आव्हान

चंदीगड : हरयाणा विधानसभेच्या ९० जागांसाठी आज (ता. २१) मतदान होत आहे. बहुतांश जागांवर भाजप, काँग्रेस, इंडियन नॅशनल लोकदल (आयएनएलडी ) व जननायक जनता पार्टी यांच्या बहुरंगी लढती होत आहेत. १९,५७८ मतदान केंद्रावर १.८३ कोटी मतदार मतदानाचा हक्क बजावणार आहेत.

हरयाणामधील ९० जागांसाठी ११६९ उमेदवार मैदानात उतरले आहे. गेल्या १५ दिवसांपासून आघाडीच्या चारही पक्षांनी प्रचाराच्या रणधुमाळीत झोकून दिले होते. २०१४ च्या निवडणुकीत ४७ जागा जिंकणाऱ्या भाजपने यंदा ७५ जागांचा नारा दिला आहे. काँग्रेस १७ व आयएनएलडीला १९ जागांवर समाधान मानावे लागले होते. पण या निवडणुकीत भाजपला काँग्रेस व जननायक जनता पार्टीकडून तगडे आव्हान मिळत आहे.

काँग्रेसने निवडणुकीआधी माजी मुख्यमंत्री भुपिंदरसिंह हुडा आणि शैलजा कुमारी यांच्याकडे पक्षाची धुरा सोपवली.या नव्या बदलामुळे काँग्रेस प्रचारात आक्रमक झाल्याचे दिसते. भाजपने कलम ३७०, जम्मू काश्मीरचा मुद्दा आणि देशभक्तीच्या मुद्यांवर प्रचारात भर दिला. तर काँग्रेस, जेजेपीने मुख्यमंत्री खट्टर यांच्या सरकारची धोरणे, बेरोजगारी, आर्थिक अडचणी, शेतकऱ्यांच्या प्रश्नांवर धारेवर धरले होते. खाण घोटाळा, नोकर भरतीतील गैरकारभार यावर विरोधी पक्षांनी प्रचारात जोर दिला होता.

निवडणुकीत प्रमुख पक्षांनी जाट समाजाच्या भोवतीच रणनिती आखली आहे. २५ टक्के मतदार असणाºया जाट समाजामधून भाजपकडून २०, जननायक जनता पाटीकडून ३३ तर काँग्रेसकडून २५ जाट उमेदवार मैदानात आहेत. तिकीट नाकारल्यामुळे भाजपच्या काही आमदारांनी बंडखोरी केली असून त्याचा किती फटका बसणार हे निकाला दिवशीच समजणार आहे. मुख्यमंत्री मनोहर खट्टर, माजी मुख्यमंत्री भुपिंदरसिंह हुडा, काँग्रेस प्रवक्ते रणदीपसिंह सुरजेवाला,कुलदीप बिश्णोई, दुषंत चौटाला, अभयसिंह चौटाला, कुस्तीपटू बबिता फोगाट, योगेश्वर दत्त, टीकटॉक आर्टिस्ट सोनाली फोगट हे प्रसिद्ध चेहरे निवडणुकीत रिंगणात नशीब आजमावत आहेत. यासोबत लाल कुटुंबातील नेते ही मैदानात आहेत.

१९,५७८ मतदान केंद्रावर जवळपास ७५ हजार सुरक्षा रक्षक तैनात करण्यात आले आहे. २७६११ व्हीव्हीपॅट मशिन मतदान केंद्रावर बसवण्यात आले आहेत. तसेच ८५ लाख महिला मतदारांसह एकूण १.८३ कोटी मतदार आज मतदानांचा हक्क बजावतील असे मुख्य निवडणूक अधिकारी अनुराग अग्रवाल यांनी सांगितले.