Narendra Modi : "बिहारच्या गरिबांना लुटणाऱ्यांचं काउंटडाउन सुरू झालं, त्यांना लवकरच जेलमध्ये जावं लागेल"

Lok Sabha Election 2024 And Narendra Modi : बिहारच्या काराकाट लोकसभा मतदारसंघातील निवडणूक सभेला संबोधित करताना पंतप्रधान नरेंद्र मोदी यांनी आरजेडीवर जोरदार पलटवार केला आहे.

बिहारच्या काराकाट लोकसभा मतदारसंघातील निवडणूक सभेला संबोधित करताना पंतप्रधान नरेंद्र मोदी यांनी आरजेडीवर जोरदार पलटवार केला आहे. नोकरीच्या बदल्यात जमिनी घेतल्या त्यांना लवकरच जेलमध्ये पाठवलं जाईल, असंही म्हटलं आहे. 

बिहारमधील काराकाटमध्ये पंतप्रधान मोदी म्हणाले की, "हेलिकॉप्टरमध्ये चक्कर मारण्याची वेळ पूर्ण होताच जेलमध्ये जाण्याचा मार्ग निश्चित केला जाईल. बिहार लुटणाऱ्यांना एनडीए सरकार सोडणार नाही, ही मोदींची गॅरंटी आहे."

"काउंटडाउन सुरू झालं"

"मी बिहारच्या जनतेला आणखी एक गॅरंटी देत ​​आहे, ज्यांनी बिहारच्या गरिबांना लुटलं आणि त्यांना नोकऱ्यांच्या बदल्यात जमिनी घेतल्या, कान देऊन ऐका. त्यांचं जेलमध्ये जाण्याचं काउंटडाउन सुरू झालं."

"आज अयोध्येत भव्य राम मंदिर आहे. काही गोंधळ झाला का? असं म्हटलं होतं की कलम 370 हटवलं तर आग लागेल? देशात बॉम्बस्फोट होतील. त्यांच्या धमक्यांना मोदी घाबरले नाहीत आणि थांबले नाहीत, कुठेतरी आग लागली आहे का? हे लोक घाबरवण्याचं काम करतात."

काँग्रेस आणि आरजेडीवर साधला निशाणा 

पंतप्रधान मोदी म्हणाले, "हे भ्याड काँग्रेस आणि आरजेडीचे लोक म्हणत आहेत की पाकिस्तानकडे अणुबॉम्ब आहे, घाबरा. या भ्याड लोकांमुळे पाकिस्तानचे दहशतवादी हवं तेव्हा भारतावर हल्ले करायचे आणि निघून जायचे. मोदी त्यांच्यासारखे घाबरत नाहीत."

"जेलमध्ये जावंच लागेल"

"मोदींनी लष्कराला सांगितलं की, घरात घुसून मारा. आज पाकिस्तान काहीही करण्यापूर्वी 100 वेळा विचार करतो. आज नक्षलवाद्यांचा खात्मा करण्याचं काम सुरू आहे ज्यांच्या नावाने हे लोक घाबरायचे. मोदी घाबरत नाहीत. कोणीही मोठी व्यक्ती असूदे जेलमध्ये जावंच लागेल."

"काँग्रेसने केलाय अपमान"

मोदींनी काँग्रेसवरही निशाणा साधला आहे. "काँग्रेसच्या पंजाबच्या नेत्याने बिहारमधून कामासाठी गेलेल्या आमच्या बिहारी मजूर बंधू-भगिनींचा घोर अपमान केला आहे. बिहारच्या लोकांना पंजाबमध्ये घरं दिली जाणार नाहीत, त्यांना प्रवेश दिला जाणार नाही, असं सांगण्यात आलं आहे."

"बिहारच्या लोकांचा एवढा अपमान केल्याबद्दल काँग्रेसच्या राजघराण्याने त्यांची माफी मागितली आहे का? डीएमके नेत्याने बिहारच्या लोकांना शिव्या दिल्या, ममता बॅनर्जी रोज त्यांना शिव्या देतात. पण काँग्रेस-ममता आणि डीएमकेविरोधात एक शब्दही बोलण्याची हिंमत आरजेडीमध्ये नाही" असं मोदींनी म्हटलं आहे.