किसमें कितना हैं दम! NDA सोबत ३८, तर INDIAमध्ये २६ पक्ष सहभागी; कोण ठरणार किंगमेकर? 

NDA Vs India: कोण किंगमेकर ठरेल, NDA की INDIA कोणात जास्त दम आहे, जाणून घ्या...

NDA Vs India: २०२४ च्या लोकसभा निवडणुकीच्या पार्श्वभूमीवर सत्ताधारी NDA आणि विरोधक INIDA यांनी एकमेकांविरोधात शड्डू ठोकल्याचे पाहायला मिळत आहे. भाजपविरोधी पक्षांची एक बैठक बंगळुरूत असून, विरोधकांना चितपट करत शक्तिप्रदर्शन करण्यासाठी NDA ची एक बैठक दिल्लीत होत आहे. या दोन्ही बैठकांना दिग्गज राजकारण्यांनी हजेरी लावली आहे. देशभरातील ३८ पक्ष एनडीएसोबत असून, २६ पक्षांनी विरोधी गट इंडियाला पाठिंबा दिल्याचे पाहायला मिळत आहे. यातच कोण किंगमेकर ठरेल, एनडीए की इंडिया कोणात जास्त दम आहे, याबाबत राजकीय वर्तुळात चर्चा होऊ लागली आहे. 

२०२४ च्या लोकसभा निवडणुकीच्या पार्श्वभूमीवर विरोधकांची एकजुट तर होत आहे. पण २०१९च्या निवडणुकीनंतर एनडीएतून अनेक पक्ष बाहेर पडले होते. त्यामुळे मोठा विजय मिळवण्यासाठी एनडीएची तितकी ताकद राहिली आहे का? अशी चर्चा राजकीय वर्तुळात आहे. 

NDA सोबत कोणते पक्ष आहेत?

NDA - भाजप, शिवसेना (एकनाथ शिंदे), रालोपा (पारस), लोपा (पासवान), अपना दल (सोनेलाल), AIDMK, आरपीआय (आठवले), राष्ट्रवादी काँग्रेस (अजित पवार), एनपीपी, एनडीपीपी, एसकेएम, आयएमकेएमके, आजसू, एमएनएफ, एनपीएफ, जेजेपी, आयपीएफटी (त्रिपुरा), बीपीपी, पीएमके, एमजीपी, एजीपी, निषाद पार्टी, युपीपीएल, एआयआरएनसी, टीएमसी (तमिळ मनिला काँग्रेस), शिरोमणी अकाली दल संयुक्त, जनसेना, हम, रालोसपा, सुभासपा, बीडीजेएस (केरळ), केरळ काँग्रेस (थॉमस), गोरखा नॅशन लिबरेशन फ्रन्ट, जनातिपथ्य राष्ट्रीय सभा, युडीपी, एचएसडीपी, जनसुराज पार्टी, प्रहार जनशक्ती पार्टी.

INDIA ला पाठिंबा दिलेले पक्ष कोणते?

INDIA - काँग्रेस, द्रमुक, तृणमूल काँग्रेस, जदयू, शिवसेना (उबाठा), राष्ट्रवादी काँग्रेस (शरद पवार), सीपीएम, सपा, इंडियन युनियन मुस्लीम लीग, सीपीआय, आप, झारखंड मुक्ती मोर्चा, केरळ काँग्रेस (एम), राजद, नॅशनल कॉन्फरन्स, पीडीपी, सीपीआय (एमएल), आरएलडी, एमएमके, एमडीएमके, वीसीके, आरएसपी, केएमडीके, केरळ काँग्रेस, अपना दल (कमेरावादी) आणि एआयएफबी.

NDA की INDIA कोण बाजी मारणार?

सन २०१९ च्या लोकसभा निकालाची आकडेवारी आणि मतांची टक्केवारी पाहिल्यास, या निवडणुकीत भाजपप्रणित एनडीएला ३५३ जागांवर विजय मिळाला होता. पैकी भाजपला ३७.७ टक्के मते मिळाली होती. तर एनडीएला एकत्रित ४५ टक्के मतदान झाले होते. बिगर एनडीएतील पक्षांना ५५ टक्के मतदान झाले होते. २०१९च्या निवडणुकीत काही विरोधी पक्ष एकत्रित तर काही स्वतंत्रपण लढले होते. यामध्ये काँग्रेसला ५२ जागा मिळाल्या होत्या. या निवडणुकीत काँग्रेसला विरोधीपक्ष नेतेपदावर दावा करण्यासाठी १० टक्के जागा कमी पडल्या होत्या. INDIA या आघाडीतील पक्षांचे मिळून १५० खासदार आहेत.

दरम्यान, एनडीएमध्ये समाविष्ट झालेल्या ३८ पक्षांपैकी ६५ टक्के पक्षांकडे एकही लोकसभेची जागा नाही. तर दुसरीकडे INDIAच्या बैठकीत समाविष्ट झालेल्या २६ पक्षांपैकी ५० टक्क्यांहून अधिक पक्षांकडे लोकसभेत एकही खासदार नाही. बिगर एनडीए पक्ष एकत्र येऊन लढले तर एनडीएपेक्षा वरचढ ठरू शकतात, असे म्हटले जात आहे.