- ऑनलाइन लोकमत
रायपूर, दि. 24 - छत्तीसगडमधील कोरिया जिल्ह्यात एका महिलेने आपण गेली 18 वर्ष फक्त ब्लॅक टी पिऊन जिवंत असल्याचा दावा केला आहे. 48 वर्षीय पीली बाई यांना पाटणाला शिक्षणासाठी पाठवण्यात आलं होतं, तेव्हाच त्यांनी अन्नाचा त्याग केला होता. त्यानंतर कधीच त्यांनी अन्नाला शिवलं नाही. 1995 मध्ये त्यांचं लग्न झालं, पण ते फक्त एक दिवसच टिकलं.
पीली बाई अजूनपर्यंत जिवंत आहेत हे पाहून डॉक्टरही आश्चर्य व्यक्त करतात. 'पीली बाई आपल्या कुटुंबासोबत गावी राहतात. गेली 18 वर्ष त्यांनी अन्नाचा एक घासही घेतलेला नाही. फक्त ब्लॅक टी पिऊन त्या जिवंत आहेत. आम्ही अनेक वेळा त्यांना डॉक्टरांकडे नेलं, पण डॉक्टरही त्या एकदम तंदुरुस्त असल्याचं सांगतात', अशी माहिती एका नातेवाईकाने दिली आहे.
स्थानिक रुग्णालयातील डॉक्टर राकेश शर्मा यांनी हे चमत्कारापेक्षा कमी नसल्याचं म्हटलं आहे. 'पीली बाई अनेकदा आपल्या कुटुंबियांसोबत माझ्याकडे तपासणीसाठी आली आहे. काहीही न खातादेखील त्यांची तब्ब्येत एकदम चांगली असून त्यांचं वजन 45 किलो आहे ही आश्चर्याची गोष्ट आहे. त्यांना एका आठवड्यासाठी रुग्णालयात भर्ती कऱण्यात आलं होतं तेव्हा त्यांना देखरेखीखाली ठेवण्यात आलं. हे कसं काय होऊ शकतं यावरुन आम्हीही हैराण झालो आहोत. रुग्णालयातील कर्मचा-यांनी तर त्यांनी ब्लॅक टी वुमन असं नावही ठेवलं होतं', असं राकेश शर्मांनी सांगितलं आहे.