Punjab Assembly Election Result: चरणजित सिंग यांना चरणजित सिंग यांचा धक्का; पंजाबमध्ये आपचा काँग्रेसला दणका

Punjab Assembly Election Result: पंजाबमध्ये लक्षवेधी लढतीत काँग्रेसला आपचा दणका

चंदिगढ: पंजाबमध्ये सत्ताधारी काँग्रेसला मोठा धक्का बसताना दिसत आहे. आम आदमी पक्षानं सुरुवातीच्या कलांमध्ये जोरदार मुसंडी मारली आहे. ११७ मतदारसंघ असलेल्या पंजाबमध्ये आप ९० जागांवर पुढे आहे. विशेष म्हणजे आपच्या मुसंडीमुळे काँग्रेसची वाताहत होताना दिसत आहे. काँग्रेसचे दिग्गज नेते सध्या पिछाडीवर आहेत. 

काँग्रेस नेते नवज्योत सिंग सिद्धू, मुख्यमंत्री चरणजीत सिंग चन्नी पिछाडीवर आहेत. बरनाला जिल्ह्यातील भदौर विधानसभा मतदारसंघात चरणजीत सिंग चन्नी मागे आहेत. या मतदारसंघात आपचे उमेदवार लाभ सिंग उग्गोके आघाडीवर आहेत. पंजाबचे कृषिमंत्री रणदीप सिंगदेखील पिछाडीवर आहेत.

मुख्यमंत्री चरणजीत सिंग चन्नी चमकौर साहेब मतदारसंघातही पिछाडीवर आहेत. विशेष म्हणजे इथे त्यांचा मुकाबला आपचे नेते चरणजीत सिंग यांच्याशी होता. दोन्ही उमेदवारांची नावं सारखी आहेत. मतदारांनी आपच्या चरणजीत सिंग यांना पसंती दिल्याचं दिसत आहे. 

मुख्यमंत्री चरणजीत सिंग चन्नी २०१७ मध्ये चमकौर साहेब मतदारसंघातून विजयी झाले होते. मात्र यंदा त्यांना आपनं जोरदार धक्का दिला आहे. चन्नी दोन्ही मतदारसंघात पिछाडीवर आहेत. थोड्याच वेळात ते राज्यपालांची भेट घेऊन मुख्यमंत्रिपदाचा राजीनामा देणार आहेत.