राहुल गांधींना लोकसभेत बसण्याचाही नैतिक अधिकार नाही, राजनाथ सिंह गरजले

'हा संपूर्ण देशातील महिलांचा अपमान आहे'

नवी दिल्ली : काँग्रेसचे माजी अध्यक्ष खासदार राहुल गांधी यांनी बलात्काराच्या मुद्द्यावरुन 'मेक इन इंडिया' ऐवजी 'रेप इन इंडिया' असे विधान करत केंद्र सरकारवर टीका केली होती. यावरुन लोकसभेत शुक्रवारी सत्ताधारी भाजपाच्या खासदारांनी मोठा गदारोळ केला. यावेळी राहुल गांधींना लोकसभेचे सदस्य होण्याचा किंवा खासदार म्हणून इथे बसण्याचा नैतिक अधिकार नाही, अशा शब्दांत संरक्षणमंत्री राजनाथ सिंह यांनी राहुल गांधी यांच्यावर निशाणा साधला. 

पंतप्रधान नरेंद्र मोदी मेक इन इंडिया अभियान मजबूत करण्याचा प्रयत्न करत आहेत. 'आयात करणारा देश' ही भारताची ओळख बदलून निर्यातदार देश करण्याचा आमचा प्रयत्न आहे. त्यासाठी वेगवेगळ्या योजनाही राबवल्या जाताहेत. त्या माध्यमातून देशातील तरुणांना रोजगार मिळू शकतील. परंतु, काँग्रेसच्या माजी अध्यक्षांनी 'मेक इन इंडिया'वरून जो शब्दप्रयोग केला आहे, तो अस्वस्थ करणारा, जनभावना दुखावणारा आहे. असा शब्दच्छल करणारे लोकही या सभागृहात निवडून येऊ शकतात का? असा सवाल करत राजनाथ सिंह यांनी राहुल गांधी यांच्यावर हल्लाबोल केला. 

Defence Min Rajnath Singh in Lok Sabha on Rahul Gandhi's 'rape in India' remark: Mein toh ahat hua hun, poora desh ahat hua hai. Kya aise log sadan mein aa sakte hain jo aise shabd istemaal karte hain? Kya unko poore sadan hi nahi balki poore desh se maafi nahi mangni chahiye. pic.twitter.com/vew1wHg8EX

— ANI (@ANI) December 13, 2019

याचबरोबर, आमच्या पक्षातील काही व्यक्तींनी अपशब्द वापरले होते, तेव्हा आम्ही त्यांना बोलावून खेद व्यक्त करायला, माफी मागायला सांगितली होती. मात्र, राहुल गांधी यांनी फक्त या सभागृहाचीच नव्हे, तर संपूर्ण देशाची माफी मागायला हवी, असेही राजनाथ सिंह यावेळी म्हणाले. 

तत्पूर्वी, केंद्रीय मंत्री स्मृती इराणी यांनी लोकसभेत राहुल गांधी यांच्यावर टीकास्त्र सोडले. राहुल गांधी यांनी देशातील महिलांचा अपमान केला आहे. एका पक्षाचे नेते 'रेप इन इंडिया' असे बोलतात. देशातील महिलांचा बलात्कार करायला या, असे विधान देशाच्या इतिहासात पहिल्यांदाच केले असेल. हा महिलांचा अपमान सहन करणार नाही. गांधी कुटुंबातील व्यक्तीने असे विधान करुन देशातील महिलांचा अपमान केला. हा संपूर्ण देशातील महिलांचा अपमान आहे, असे म्हणत स्मृती इराणी यांनी राहुल गांधी यांच्यावर टीका केली. 

#WATCH Union Minister Smriti Irani in Lok Sabha on Rahul Gandhi's 'rape in India' remark: This is first time in history that a leader is giving a clarion call that Indian women should be raped. Is this Rahul Gandhi's message to the people of the country? https://t.co/fRpcJ4TgIupic.twitter.com/7ErDftk1MA

— ANI (@ANI) December 13, 2019