नवी दिल्ली : काँग्रेसचे उपाध्यक्ष राहुल गांधी यांच्या ४६ व्या वाढदिवसानिमित्त रविवारी पंतप्रधान नरेंद्र मोदी यांच्यासह विविध पक्षांच्या नेत्यांनी शुभेच्छांचा वर्षाव केला. विशेषत: काँग्रेसचे कार्यकर्ते आणि ज्येष्ठ नेत्यांचा त्यात समावेश होता.राहुल गांधी यांना दीर्घ आणि निरामय आयुष्यासाठी शुभेच्छा देतो, असे मोदींनी रविवारी सकाळी टिष्ट्वट केले. थँक यू मोदीजी, आपल्या प्रेमळ शुभेच्छांबद्दल आभारी आहे, असे राहुल गांधींनी आभारादाखल टिष्ट्वटमध्ये म्हटले. राज्यसभेतील विरोधी पक्षनेते गुलाम नबी आझाद, अहमद पटेल, पी.चिदंबरम, शीला दीक्षित, मोतीलाल व्होरा आणि आनंद शर्मा यांनी राहुल गांधी यांच्या १२ तुघलक लेन येथील निवासस्थानी जाऊन शुभेच्छा दिल्या. काँग्रेसच्या मुख्यालयात शेकडो कार्यकर्त्यांनी त्यांना भेटण्यासाठी गर्दी केली होती. काँग्रेसचे प्रदेशाध्यक्ष अजय माकन त्यावेळी उपस्थित होते. विविध राज्यांचे मुख्यमंत्री, भाजपचे नेते शहनवाज हुसेन, राजदचे अध्यक्ष लालूप्रसाद यादव, राष्ट्रवादी कॉग्रेसचे नेते प्रफुल्ल पटेल आदींनी शुभेच्छा दिल्यात. (लोकमत न्यूज नेटवर्क)
राहुल गांधी ४६ वर्षांचे झाले; शुभेच्छांचा वर्षाव
By admin | Published: June 20, 2016 4:38 AM