- ऑनलाइन लोकमत
चंदिगड, दि. 7 - आम आदमी पक्षाच्या अडचणी दिवसेंदिवस वाढताना दिसत आहेत. संदीप कुमार सेक्स स्कॅण्डलमुळे विरोधकांच्या आणि लोकांच्या टीकेला सामेरं जावे लागलेल्या आपच्या अजून एका नेत्यावर बलात्काराचा आरोप करण्यात आला आहे. आपच्या पंजाब पक्ष निरीक्षकावर मोलकरणीवर बलात्कार केल्याचा आरोप करण्यात आला असून विशेष गोष्ट म्हणजे आपच्या कार्यकर्त्यांनीच ही घटना समोर आणली आहे.
पंजाब पक्ष निरीक्षक विजय चौहान यांच्यावर हा आरोप करण्यात आला आहे. आरोपानुसार त्यांच्या घरी काम करणा-या मोलकरणीवर त्यांनी बलात्कार केल्याचं सांगण्यात आलं आहे. विजय चौहान यांच्यावर आपने सुनम आणि बरनाला मतदारसंघाची जबाबदारी सोपवलेली आहे.
स्थानिक नेते राजवत सिंह आणि मोलकरणीमध्ये झालेल्या संभाषणाची एक ऑडिओ क्लिप जारी करण्यात आली आहे. संभाषादरम्यान राजवत सिंह हे प्रकरण थांबवण्यासाठी प्रयत्न करताना दिसत आहेत. सोबतच विजय चौहान यांच्याविरोधात तक्रार न करण्यासाठी मोलकरणीवर दबाव आणत आहेत.
आपच्या बंडखोरांनी ही ऑडिओ क्लिप सर्वांसमोर आणली असून पक्षातील ज्येष्ठ नेत्यांना याबद्दल कल्पना असूनही कारवाई करत नसल्याचा आरोप केला आहे. अडचणी वाढू नयेत यासाठी पक्षाने विजय चौहान यांच्याकडून सुनम आणि बरनाला मतदारसंघाची जबाबदारी काढून घेतली आहे आणि पटियालाच्या पक्ष निरीक्षकाची जबाबदारी सोपवली आहे. पीडित महिलेने तोंड बंद ठेवावे यासाठी एक लाख रुपये दिल्याचा आरोपही करण्यात आला आहे.