अरे देवा! मालगाडीचे २ डबे घसरले; बादल्या, कॅन घेऊन डिझेल लुटण्यासाठी लोकांची झुंबड

मालगाडीत डिझेल भरलं होतं, ही बाब आजूबाजूच्या लोकांना कळताच ते घरातून बादल्या, कॅन आणि मिळेल ती वस्तू घेऊन डिझेल गोळा करण्यासाठी आले.

मध्य प्रदेशातील रतलाममध्ये मालगाडीचे दोन डबे रुळावरून घसरले. मालगाडीत डिझेल भरलं होतं, ही बाब आजूबाजूच्या लोकांना कळताच ते घरातून बादल्या, कॅन आणि मिळेल ती वस्तू घेऊन डिझेल गोळा करण्यासाठी आले. लोकांची डिझेलसाठी झुंबड उडाली. यावेळी सुरक्षेसाठी तैनात असलेले पोलीस बघतच राहिले आणि डिझेलची लूट सुरूच होती.

मालगाडी बडोद्याहून भोपाळला जात होती. याच दरम्यान रतलामजवळ मालगाडीचे दोन डबे रुळावरून घसरले. सुदैवाने मोठा अपघात टळला असला तरी मालगाडीचे डबे डिझेलने भरल्याचे समजताच लोक घरातून बादल्या आणि कॅन घेऊन डिझेल गोळा करण्यासाठी गेले. लोकांनी बादल्या आणि कॅनमधून डिझेल नेलं. काही लोकांनी याचे व्हिडिओही बनवले आहेत जे आता सोशल मीडियावर व्हायरल होत आहेत.

मालगाड़ी के बैपटरी होते ही डीजल की मची लूट
- ग्रामीण बाल्टी, डिब्बे लेकर पहुंचे डीजल भरने, पुलिस देखती रही pic.twitter.com/0TxBYTSLPg

— Nitinthakur (Abp NEWS) (@Nitinreporter5) October 4, 2024

रेल्वे वाहतूक विस्कळीत 

या घटनेनंतर तब्बल १२ तासांहून अधिक काळ रेल्वे सेवा प्रभावित झाली होती. रेल्वेचे जनसंपर्क अधिकारी खेमराज मीणा यांनी दिलेल्या माहितीनुसार, दिल्ली मुंबई मार्गावर हा अपघात झाला. या घटनेच्या चौकशीचे आदेश देण्यात आले आहेत. मीणा यांच्या म्हणण्यानुसार, सुमारे १२ तास रेल्वे वाहतूक विस्कळीत झाली होती. आजकाल देशभरात गाड्या रुळावरून घसरल्याच्या अनेक घटना समोर येत आहेत.