ऑनलाइन लोकमत
मुंबई, दि. 30 - एंटरटेनमेंट चॅनेल ‘द व्हायरल फीव्हर’ (TVF) चे सीईओ आणि संस्थापक अरुणाभ कुमार यांच्याविरोधात लैंगिक शोषणाचा गुन्हा दाखल करण्यात आला आहे. एका महिलेने केलेल्या तक्रारीनंतर एमआयडीसी पोलीस स्थानकात गुन्हा दाखल करण्यात आला असून या महिलेची ओळख उघड करण्यात आलेली नाही. गुन्हा दाखल करण्यात आला असला तरी अद्याप अरुणाभ कुमार यांनी पोलिसांनी अटक केलेली नाही.
हे प्रकरण 2016 मधील असून पीडित तरुणी मुलाखतीसाठी गेली असता अरुणाभ कुमार यांनी तिच्यासोबत अश्लील चाळे केल्याचा आरोप आहे अशी माहिती पोलिसांनी दिली आहे. मात्र कोणाच्या तक्रारीवर एफआयआर दाखल करण्यात आला आहे हे पोलिसांनी उघड केलेलं नाही.
अरुणाभ कुमार यांच्याविरोधात लैंगिक छळाचा आरोप होण्याची ही दुसरी वेळ आहे. गेल्याच महिन्यात TVF ची माजी कर्मचारी असलेल्या महिलेने ब्लॉगच्या माध्यमातून अरुणाभ कुमार यांनी लैंगिक छळ केल्याचा आरोप केला होता. 2014 ते 2016 दरम्यान TVF मध्ये काम करत असताना आपला लैंगिक छळ करण्यात आल्याचं तिने पोस्टमध्ये लिहिलं होतं. ही पोस्ट सोशल मीडियावर व्हायरल झाली होती.
TVF ने हे सर्व आरोप फेटाळून लावले आहेत. तसंच खोटं आरोप करणा-या आणि चुकीची माहिती देणा-यांना सोडणार नाही असं म्हटलं आहे. "आपल्यावर लावण्यात आलेले सर्व आरोप फेटाळून लावत अरुणाभ यांनी त्या सर्वांविरोधात गुन्हा दाखल केला पाहिजे, तसेच याप्रकरणी निष्पक्ष न्यायालयीन चौकशी झाली पाहिजे", अशी मागणी मुंबई मिररला दिलेल्या मुलाखतीत अरुणाभ यांनी केली होती.
तक्रारीनंतर पोलिसांनी कारवाईला सुरुवात केली असून लवकरच अरुणाभ कुमार यांना अटक होण्याची शक्यता वाढली आहे.