ज्या खासदाराने मिमिक्री केली, त्यांनाच जगदीप धनखड यांनी जेवणाचे आमंत्रण दिले...

जगदीप धनखड यांनी TMC खासदार कल्याण बॅनर्जी यांना वाढदिवसानिमित्त शुभेच्छा दिल्या आणि कुटुंबासमवेत जेवणाचे आमंत्रणही दिले.

Jagdeep Dhankhar-Kalyan Banerjee : संसदेच्या हिवाळी अधिवेशनात भारताचे उपराष्ट्रपती आणि राज्यसभा सभापती जगदीप धनखड यांचे मिमिक्री प्रकरण चांगलेच गाजले होते. आता धनखड यांनी मोठं मन दाखवत मिमिक्री करणाऱ्या तृणमूल काँग्रेसचे खासदार कल्याण बॅनर्जी यांना त्यांच्या वाढदिवसानिमित्त शुभेच्छा दिल्या आणि कुटुंबासमवेत जेवणाचे आमंत्रणही दिले. 

I thank Hon'ble @VPIndia for his warm greetings on my Birthday. I'm overwhelmed that he personally had a telephone conversation with my wife and conveyed his blessings to my entire family.
He also invited my wife and me to have dinner at his residence in Delhi with his family.

— Kalyan Banerjee (@KBanerjee_AITC) January 4, 2024

टीएमसी खासदारांनी X वर धनखड यांचे आभार मानले. ते म्हणाले की, 'माझ्या वाढदिवसानिमित्त शुभेच्छा दिल्याबद्दल माननीय उपराष्ट्रपतींचे आभार मानतो. त्यांनी मला आणि माझ्या पत्नीला दिल्लीतील निवासस्थानी जेवणाचे आमंत्रण दिले आहे. तसेच, वैयक्तिकरित्या टेलिफोनवर बोलून माझ्या संपूर्ण कुटुंबाला आशीर्वाद दिल्याने मी भारावून गेलो आहे,' असे कल्याण बॅनर्जी म्हणाले. 

नेमकं काय प्रकरण आहे?
संसदेच्या हिवाळी अधिवेशनात तृणमूल खासदारांनी संसद संकुलाक जगदीप धनखड यांची नक्कल केली होती. यावेळी काँग्रेस नेते राहुल गांधी यांनी त्यांच्या फोनवर हा सगळा प्रकार रेकॉर्ड केला. यानंतर, धनखड यांनी या प्रकरावर तीव्र नाराजी व्यक्त केली. विरोधकांनी सभापतीच्या खुर्चीचा आणि माझ्या समाजाचा अपमान केला, असा आरोप धनखड यांनी केला. या घटनेचे पडसाद संपूर्ण अधिवेशनात उमटले.