गुढीपाडव्यासाठी शहरातील विकासकांची लगबग

मागील काही वर्षांत घरांच्या किमती गगनाला भिडल्या आहेत. बजेटमधील घरांचा मोठ्या प्रमाणात तुटवडा निर्माण

नवी मुंबई : मागील काही वर्षांत घरांच्या किमती गगनाला भिडल्या आहेत. बजेटमधील घरांचा मोठ्या प्रमाणात तुटवडा निर्माण झाल्याने सर्वसामान्य ग्राहकांची परवड सुरू झाली आहे. यातच गेल्या वर्षी नोटाबंदीचा निर्णय झाल्याने याचा फटका घरखरेदीला बसला आहे. यातच बड्या गुंतवणूकदारांनी हात आखडता घेतल्याने विकासकांचे धाबे दणाणले आहेत. असे असले तरीही गुढीपाडव्याचा मुहूर्त साधण्यासाठी शहरातील बहुतांशी विकासकांनी कंबर कसली आहे.
नवी मुंबईत दिवसेंदिवस घरांची मागणी वाढत आहे; परंतु शहरातील जमिनीचे भाव गगनाला भिडल्याने स्वस्त व परवडणारी घरे बांधणे विकासकांना अवघड होऊन बसले आहे. मागणी व पुरवठा यात मोठ्या प्रमाणात तफावत निर्माण झाली आहे. यातच पंतप्रधान नरेंद्र मोदी यांनी नोटाबंदीचा निर्णय घेऊन या क्षेत्रातील अनिर्बंध व बेहिशोबी व्यवहाराला चाप लावला आहे. त्यामुळे मागील पाच-सहा महिन्यांपासून शहरातील मालमत्ता खरेदी-विक्रीचे व्यवहार ठप्प पडले आहेत. मालमत्ता विकल्या न गेल्याने बिल्डर्स आणि गुंतवणूकदारांचे कोट्यवधी रुपये अडकून पडले आहेत. गुढीपाडव्याचा मुहूर्त काही प्रमाणात का होईना तारून नेईल, असा विश्वास विकासकांना वाटतो आहे. या पार्श्वभूमीवर अनेक विकासकांनी ग्राहकांअभावी धूळखात पडून असलेल्या आपल्या मालमत्ता विक्रीसाठी काढल्या आहेत. ग्राहकांना आकर्षित करण्यासाठी विविध योजना जाहीर केल्या आहेत. काहींनी तर घरखरेदीवर चक्क डिस्काऊंट देऊ केले आहेत, तर अनेकांनी आपल्या नवीन गृहप्रकल्पातील घरखरेदीवर आकर्षक सवलत जाहीर केली आहे.
एकूणच घरखरेदीच्या प्रतीक्षेत असलेला ग्राहक बाहेर पडेल, असे विकासकांना वाटत आहे. साडेतीन मुहूर्तांपैकी एक असलेला गुढीपाडव्याचा दिवस नवीन खरेदीसाठी शुभ मानला जातो. तसेच सध्या वित्तसंस्थांनी गृहकर्जावरील व्याजदरातही कपात केली आहे. त्यामुळे नोटाबंदीचा कोणताही परिणाम गृहखरेदीवर होणार नाही. उलट सध्याची परिस्थिती घरखरेदीला पोषक असल्याने गुढीपाडव्याला ग्राहकांचा चांगला प्रतिसाद मिळेल, असा विश्वास विकासकांनी व्यक्त केला आहे. (प्रतिनिधी)

च्येत्या १ एप्रिलपासून रेडीरेकनरच्या दरात दहा टक्यांनी वाढ होण्याची शक्यता आहे. त्यामुळे घरांच्या किमतीतही वाढ होणार आहे. त्यामुळे घर खरेदीसाठी ग्राहकांना ही शेवटची संधी असणार आहे. विशेष म्हणजे सध्याचे प्रचलित दर सुध्दा सर्वसामान्यांच्या आवाक्याबाहेरचे आहेत. भविष्यात ते कमी होण्याची शक्यता धुसर आहे. सर्वसामान्य ग्राहकांना ही वस्तुस्थिती पटल्याने गृहखरेदीला चांगला प्रतिसाद मिळेल, असा विश्वास विकासकांना वाटतो आहे.

रहजारो मालमत्ता खरेदीविना पडून
अगोदरच मंदीतून जाणाऱ्या रियल इस्टेट क्षेत्राला नोटाबंदीच्या निर्णयाचा फटका बसला आहे. शहराच्या विविध परिसरांत आजमितीस विविध आकाराच्या जवळपास २५ ते ३० हजार सदनिका विक्रीविना पडून आहेत. या सदनिका विकल्या जात नसल्याने विकासकांनी नवीन प्रकल्पांच्या कामाचीही गती कमी केली आहे. सध्या उपलब्ध सदनिका विकण्यावर बहुतांशी विकासकांनी भर दिला आहे.