प्रियकराच्या मदतीने केला खून

नेरूळच्या रामलीला मैदानात बुधवारी तरूणाचा खुन झाला होता. याप्रकरणी पोलिसांनी तिघांना अटक केली असून, त्यामध्ये मयताच्या पत्नीचाही समावेश आहे.

नवी मुंबई : नेरूळच्या रामलीला मैदानात बुधवारी तरूणाचा खुन झाला होता. याप्रकरणी पोलिसांनी तिघांना अटक केली असून, त्यामध्ये मयताच्या पत्नीचाही समावेश आहे.
न्हावा येथे राहणाऱ्या स्वप्नील पाटील (२९) याची बुधवारी रात्री नेरूळच्या रामलीला मैदानात हत्या झाली होती. नेरूळ पोलिसांनी तीन दिवसांत या प्रकरणाचा उलगडा केला आहे. घटना घडल्यानंतर उपायुक्त शहाजी उमाप, साहाय्यक आयुक्त धनराज दायमा, वरिष्ठ निरीक्षक संगिता अल्फान्सो यांच्या मार्गदर्शनाखाली निरीक्षक नागराज मजगे, साहाय्यक निरीक्षक जगवेंद्रसिंग राजपुत, उपनिरीक्षक नितीन शिंदे यांच्या पथकाने शीघ्र गतीने तपासाला सुरुवात केली होती. तपासाअंती त्यांनी मयत स्वप्नीलच्या पत्नीसह कराड येथील दोघांना अटक केली आहे. मयताची पत्नी कराडला गेले असताना तिची सलमान ऊर्फ इलाही शेख (२१) याच्यासोबत तिची ओळख झाली होती. त्यांच्यात काही भेटींनंतर प्रेमप्रकरण सुरू झाले होते. तिने तिच्या आईची व सलमानची भेट करून दिली होती. यामुळे सलमान हा नेरूळ येथे तिच्या माहेरी देखील ये-जा करीत असे. ही बाब स्वप्नीलला समजताच त्यांच्यात भांडणदेखील झाले होते. याविषयी तिने सलमानला सांगितले. यामुळे संताप अनावर होऊन मित्रांच्या सहकार्याने स्वप्नील पाटीलचा खून केला होता, अशी माहिती पोलिस उपायुक्त शहाजी उमाप यांनी दिली. (प्रतिनिधी)