बस थांबे गॅरेजचालकांना आंदण; महापालिकेसह वाहतूक विभागाचे दुर्लक्ष

एनएमएमटीच्या प्रवाशांची गैरसोय

नवी मुंबई : पदपथावरील बेकायदा गॅरेजमुळे वाहतुकीचा बोजवारा उडाला आहे. शहराच्या बहुतांशी भागात अशाप्रकारे बेकायदा गॅरेज व वाहनांच्या सुट्या भागांची विक्री करणाऱ्या दुकानांचे पेव फुटल्याचे दिसून आले आहे. अनेक भागांत थेट एनएमएमटी थांब्याच्या समोरच वाहनदुरुस्तीचा उद्योग सुरू असल्याने प्रवाशांची मोठ्या प्रमाणात गैरसोय होत आहे. या प्रकाराकडे महापालिकेसह वाहतूक विभागाकडून सोयीस्करपणे दुर्लक्ष केले जात असल्याने रहिवाशांनी संताप व्यक्त केला आहे.

नवी मुंबईत वसाहतीअंतर्गत रस्त्यावरी बेकायदा पार्किंगचा प्रश्न दिवसेंदिवस गंभीर बनू लागला आहे. रस्त्यावर दुतर्फा उभ्या असणाºया वाहनांमुळे परिसरात वाहतूककोंडीची समस्या निर्माण झाली आहे. अगोदरच अरुंद असलेले रस्ते दुतर्फा वाहनपार्किंगमुळे आणखी निमुळते झाले आहेत. त्यामुळे एनएमएमटीसह स्कूलबसना अशा रस्त्यांतून मार्ग काढताना कसरत करावी लागत आहे. रुग्णवाहिकांचा तर अनेकदा खोळंबा झाल्याची उदाहरणे आहेत.

रस्त्यांवरील दुतर्फा वाहन पार्किंग त्रासाचे ठरत असतानाच आता एनएमएमटीच्या बसथांब्यासमोर अगदी रस्त्यावर थाटलेल्या वाहनदुरुस्तीच्या बेकायदा व्यवसायाने शहरवासीयांची डोकेदुखी वाढविली आहे. शहरवासीयांना एनएमएमटीच्या प्रवासी सेवेचा अधिकाधिक लाभ व्हावा, यादृष्टीने परिवहन उपक्रमाचे प्रयत्न आहेत. त्यानुसार अनेक भागात गरजेनुसार एनएमएमटीच्या सेवा सुरू करण्यात आल्या आहेत. त्यासाठी आवश्यक तेथे बस थांबे उभारले आहेत. मात्र, आता हेच बस थांबे अनधिकृत गॅरेज व्यावसायिकांना आंदण ठरू लागले आहेत.

कोपरखैरणे येथील जीमी टॉवरसमोर असलेल्या स्मशानभूमीच्या प्रवेशद्वाराजवळ एनएमएमटीचा बस थांबा आहे. या बसथांब्यावर नेहमीच रिक्षांची दुरुस्ती सुरू असते. समोरच गॅरेज असल्याने येथील कारागीर सर्रासपणे बस थांब्याच्या समोर रिक्षा उभ्या करून दुरुस्तीची कामे करतात. एका वेळी चार ते पाच रिक्षा उभ्या असतात. तसेच याच रस्त्याच्या अगदी समोरच्या बाजूलाही रिक्षांच्या रांगा लागलेल्या असतात. त्यामुळे येथे नेहमीच वाहतुकीची कोंडी होत असते.

रिक्षांच्या दुरुस्तीचे काम अगदी बसथांब्याच्या समोरच केले जात असल्याने प्रवाशांची तारांबळ उडते. तसेच बसचालकांनाही बस थांब्याचा अंदाज येत नसल्याने रस्त्याच्या मधोमध बस उभी करावी लागते. विशेष म्हणजे, यासंदर्भात ‘लोकमत’मधून अनेकदा वृत्त प्रसिद्ध करण्यात आले. मात्र, त्यानंतरही हे बेकायदा गॅरेज जैसे थे असल्याने रहिवाशांनी संताप व्यक्त केला आहे. कोपरखैरणेप्रमाणेच शहराच्या विविध भागात अशाच प्रकारे गॅरजचालकांचा उच्छाद दिसून येतो. बोनकोडे येथील बालाजी कॉम्प्लेक्ससमोरील बस थांब्यावरही बेकायदेशीर वाहनांच्या दुरुस्तीची कामे केली जातात. शहरातील अनेक भागात कमी-अधिक प्रमाणात हे चित्र पाहावयास मिळते.

एनएमएमटीचे थांबे गॅरेजचालकांनी बळकावले आहेत. कारवाईचा कोणताही मुलाहिजा न बाळगता सर्रासपणे बसथांब्याच्या समोरच वाहनांना जॅक लावून दुरुस्तीची कामे केली जातात. कोपरखैरणेसह बोनकोडे येथील बालाजी टॉवर्सच्या समोरील थांब्यावरही असाच प्रकार सुरू असल्याचे दिसून येते. कोपरखैरणेसह शहरातील अनेक बसथामबे गॅरेजचालकांना आंदण दिल्यासारखी परिस्थिती आहे.