सिडकोकडून कामगारांना मिळणार ४ कोटींचा बोनस

आझाद कामगार संघटनेच्या पाठपुराव्याला यश

कळंबोली : पूर्वी सिडकोमध्ये कार्यरत असलेले मात्र गेल्या पंधरा महिन्यांपासून पनवेल महानगरपालिकेकडे काम करणाºया साडेपाचशे सफाई कामगारांना सिडकोकडून थकीत बोनस देण्यात येणार आहे. आझाद कामगार संघटनेच्या पाठपुराव्याला अखेर यश आले असून, लवकरच कामगारांच्या खात्यावर चार कोटी रुपयांची रक्कम वर्ग करण्यात येणार आहे. त्यामुळे सफाई कामगारांमध्ये आनंदाचे वातावरण आहे.

पनवेल महापालिकेने घनकचरा व्यवस्थापन आणि त्याअगोदर साफसफाईच्या कामाच्या सेवा हस्तांतरित करून घेतल्या आहेत. नवीन पनवेल, कळंबोली, खारघर, कामोठे, तळोजा आणि नावडे येथील वसाहतींमध्ये सिडको प्राधिकरण या सेवा देत होते. या ठिकाणी गेल्या अनेक वर्षांपासून कंत्राटी पद्धतीने सफाई कामगार काम करत होते. हे कामगार सेवा हस्तांतरणानंतर पनवेल पालिकेकडे वर्ग करण्यात आले. मनपाने नियमित कामावर येणाºया कामगारांना महापालिकेत कंत्राटी पद्धतीने घेतले. साई गणेश या ठेकेदाराच्या अंतर्गत हे सफाई कामगार काम करत आहेत. त्यांच्या विविध मागण्यांसाठी आझाद कामगार संघटनेच्या माध्यमातून महादेव वाघमारे हे लढा देत आहेत.

गेल्या पंधरा महिन्यापासूनच्या पगारी सुट्या, तसेच करारनामामध्ये नमूद करण्यात आलेल्या इतर सुविधा सफाई कामगारांना मिळाव्यात यासाठी लढा सुरू आहे. त्यांनी मुंबई उच्च न्यायालयातही याविषयी याचिका दाखल केली आहे. परंतु त्या अगोदर सिडकोने कामगारांना बोनस दिला नव्हता. त्यासाठी गेल्या काही महिन्यांपासून आझाद कामगार कामगार संघटनेचा सिडकोकडे पाठपुरावा सुरू होता. तसेच आंदोलनाचा इशारा देण्यात आला. याची दखल घेत सिडकोने सफाई कामगारांचा थकित बोनस देण्याचे मान्य केले. त्यानुसार आरोग्य विभागाकडून सर्व तांत्रिक बाबींची पूर्तता करण्यात आली आहे. त्यामुळे लवकरच कामगारांच्या खात्यावर बोनसची रक्कम वर्ग करण्यात येणार आहे.

सफाई कामगारांना सिडकोकडे असलेली बोनसची रक्कम लवकरात लवकर दिली जाणार आहे. त्याकरिता बँक खाते आणि इतर माहिती संकलित करण्याचे काम युद्धपातळीवर सुरू आहे. सिडको कामगारांचे पैसे देणार असल्याची भूमिका सुरुवातीपासून आहे.
- डॉ. बी. एस. बावस्कर,मुख्य आरोग्य अधिकारी, सिडको

महापालिकेच्या आडमुठ्या धोरणामुळे विलंब

पनवेल महापालिकेकडे हस्तांतरित करण्यात आलेल्या कंत्राटी पद्धतीने काम करणाºया सफाई कामगारांचा बोनस सिडकोकडे थकीत होता. ही रक्कम मिळावी यासाठी आझाद कामगार संघटनेच्या माध्यमातून महादेव वाघमारे यांनी लढा उभारला. त्यानुसार सिडकोने पनवेल महानगरपालिकेकडून सफाई कामगारांच्या बँक खात्याची माहिती मागवली होती. त्यामध्ये बोनसची रक्कम वर्ग करण्याचे ठरवण्यात आले होते. परंतु मनपाने ही माहिती दडवून ठेवली आणि ती सिडकोला दिली नाही. त्यामुळे बोनसचे पैसे देण्यास विलंब झाला असल्याचे कामगारांकडून सांगण्यात आले आहे.