चौथ्या दिवशीही संप सुरूच

सिडकोच्या सफाई कामगारांनी पुकारलेला संप चौथ्या दिवशीही सुरूच आहे. १२ एप्रिलपासून आपल्या विविध मागण्यांसाठी सिडकोचे जवळ जवळ १३०० कामगार

पनवेल : सिडकोच्या सफाई कामगारांनी पुकारलेला संप चौथ्या दिवशीही सुरूच आहे. १२ एप्रिलपासून आपल्या विविध मागण्यांसाठी सिडकोचे जवळ जवळ १३०० कामगार संपावर गेले आहेत. कोकण श्रमिक संघाच्या वतीने हा संप कामगारनेते श्याम म्हात्रे यांनी पुकारला आहे. मात्र, सिडको दखल घेत नसल्यामुळे या आंदोलनाला हिंसक वळण लागण्याची शक्यता आहे. दरम्यान, सिडको वसाहतीत साचलेला कचरा कुजण्यास सुरुवात झाल्याने दुर्गंधी पसरली असून, आरोग्याचा प्रश्न निर्माण होण्याची शक्यता आहे.
खासगी कंत्राटदाराकडून कचरा उचल्यास आंदोलक कामगार त्याला विरोध करीत असल्याने अनेक ठिकाणी या वादात पोलिसांना मध्यस्ती करावी लागली. विशेष म्हणजे, कळंबोलीमध्ये उद्भवलेल्या या परिस्थितीत ११ कामगारांना पोलिसांनी अटक केली. दरम्यान,आंदोलनकर्त्यांना सिडकोने नोटीस बजावल्या आहेत. त्यामुळे आंदोलन चिघळण्याची शक्यता निर्माण झाली आहे. सिडकोने कामागारांचा अंत पाहू नये, असा गर्भित इशारा कामगार नेते श्याम म्हात्रे यांनी दिला आहे.

भाजपाचे सोमवारी आंदोलन
शहरातील कचरा उचलला जात नसल्याने रस्त्यांवर दुर्गंधी पसरली असून नागरिक हैराण आहेत. त्यातच कामगारांच्या मागण्या सिडकोकडून मान्य करण्यात येत नसल्याने भाजपाने सोमवारी सिडको भवनावर आंदोलन करण्याचा निर्णय घेतला आहे. घरातील कचरा सिडको भवनात टाकण्याचा इशारा भाजपाच्या वतीने देण्यात आला आहे.

कळंबोलीत पोलीस बंदोबस्तात कचरा उचलला
कामगारांच्या संपामुळे सिडको वसाहतीत कचऱ्यांचे ढीग साचले आहेत. त्यामुळे नागरिकांचे आरोग्य धोक्यात सापडले आहे. शुक्रवारी भाजपा कार्यकर्त्यांनी नवीन पनवेल येथील सोसायट्यांमधील कचरा जमा केला, तर शनिवारी सिडको कार्यालयावर धडक देत प्रशासनाच्या भूमिकेबाबत तीव्र नाराजी व्यक्त केली. सफाई कामगारांच्या आंदोलनाला पाठिंबा देत त्यांच्या मागण्या त्वरित मान्य करा, नागरिकांना वेठीस धरू नका, असा इशारा भाजपाकडून सिडकोला देण्यात आला आहे.
कळंबोलीत सिडकोकडून पोलीस बंदोबस्तात जेसीबीच्या साहाय्याने दहा टन कचरा उचलण्यात आला. या वेळी सफाई कामगारांनी विरोध केला. मात्र, पोलिसांनी तो मोडून काढला. सिडकोत काम करणाऱ्या १३०० कंत्राटी कामगारांनी कायमस्वरूपी नोकरी मिळावी. त्याचबरोबर समान काम समान वेतनाची मागणी कित्येक वर्षे लावून धरली आहे. पार्श्वभूमीवर १२ एप्रिलपासून कामगारनेते श्याम म्हात्रे यांच्या नेतृत्वाखाली काम बंद आंदोलन सुरू करण्यात आले आहे.
नवीन पनवेलमधील काही सोसायट्यांमध्ये जाऊन भारतीय जनता पक्षाच्या वतीने कचरा उचलण्यात आला. त्यानंतर शेतकरी कामगार पक्षाचे कार्यकर्तेही माजी नगराध्यक्ष संदीप पाटील यांच्या नेतृत्वाखाली एकत्र आले. त्यांनी नवीन पनवेल येथीन सिडको कार्यालयाच्या बाहेरील रस्त्यावर कचरा टाकला.
शनिवारी माजी उपनगराध्यक्ष संतोष शेट्टी यांच्यासह माजी नगरसेवक नितीन पाटील, अ‍ॅड. मनोज भुजबळ, डॉ. सविता चौतमोल, सुशिला घरत, एकनाथ गायकवाड, राजश्री वावेकर, समीर ठाकूर, प्रकाश बिनेदार यांच्यासह पदाधिकाऱ्यांनी सिडकोवर धडक देत त्वरित कचरा उचलण्याची मागणी केली.

भाजपा-शेकापमध्ये जुंपली
शुक्र वारी आम्ही नवीन पनवेल येथील काही सोसायट्यांमधील कचरा उचलला. त्या वेळी याच कामाचा ठेका असलेले शेकापचे विजय म्हात्रे यांनी कचरा उचलण्यास विरोध केला. त्यानंतर शेकापने सायंकाळी सिडको कार्यालयाच्या बाहेर रस्त्यावर पडलेला कचरा घेऊन स्टंटबाजी करण्याचा प्रयत्न केला. त्या वेळी विजय म्हात्रे हे ठेकेदार असूनही सोसायट्यांमधील कचरा उचलला पाहिजे, असे उघडपणे सांगत असल्याचा आरोप संतोष शेट्टी यांनी केला. मात्र, संदीप पाटील यांनी या आरोपाचे खंडण केले. म्हात्रे हे काही मुख्य ठेकेदार नाहीत. त्यांच्यासारखे २५ जण आहेत. त्यामुळे त्यांनी जी भूमिका घेतली आहे, ती दुटप्पी नसल्याचे त्यांनी सांगितले.

सफाई कामगारांच्या मागण्यासंदर्भात वरिष्ठ पातळीवर बोलणी सुरू आहे. लवकरच तोडगा निघेल. आज दहा टन कचरा उचलला. कायदा आणि सुव्यवस्थेचा प्रश्न निर्माण होऊ नये म्हणून पोलीस बंदोबस्त मागविण्यात आला होता.
- नंदकिशोर परब,
वरिष्ठ स्वच्छता निरीक्षक, सिडको