पालिका निवडणुकीपूर्वी भाजपाला खिंडार

गणेश नाईकांना धक्का : सात आजी - माजी नगरसेवक राष्ट्रवादीमध्ये येणार; उपमुख्यमंत्र्यांची घेतली भेट

लोकमत न्यूज नेटवर्क
नवी मुंबई : महापालिका निवडणुकीपूर्वी भारतीय जनता पक्षामध्ये खिंडार पडण्यास सुरुवात झाली आहे. गत आठवड्यात पाच नगरसेवकांनी शिवसेनेत जाणार असल्याचे स्पष्ट केले आहे. गुरुवारी भाजपच्या तीन नगरसेविका व चार माजी नगरसेवकांनी उपमुख्यमंत्री अजित पवार यांची भेट घेऊन घरवापसी करणार असल्याचे स्पष्ट केले आहे. यामुळे माजी मंत्री गणेश नाईक यांना मोठा धक्का बसला आहे.
नवी मुंबई महानगरपालिका निवडणुकीची प्रक्रिया सुरू झाली आहे. १ फेब्रुवारीला प्रभाग रचना जाहीर झाल्यापासून फोडाफोडीच्या राजकारणाला गती आली आहे. माजी मंत्री गणेश नाईक यांचे कट्टर समर्थक म्हणून ओळख असणारे माजी स्थायी समिती सभापती पाच नगरसेवकांसह शिवसेनेमध्ये प्रवेश करणार आहेत. त्यांनी गत आठवड्यामध्ये मुख्यमंत्री उद्धव ठाकरे यांचीही भेट घेतली. यामुळे तुर्भे परिसरामध्ये भाजपला मोठे खिंडार पडणार असल्याचे स्पष्ट झाले आहे. यानंतर आता राष्ट्रवादीमध्येही घरवापसी सुरू झाली आहे. विधानसभा निवडणुकीपूर्वी भाजपमध्ये गेलेल्या शुभांगी पाटील, शशिकला पाटील व सलूजा सुतार यांनी पुन्हा राष्ट्रवादीमध्ये येण्याचा निर्णय घेतला आहे. त्यांनी गुरुवारी उपमुख्यमंत्री अजित पवार यांची भेट घेतली. त्यांच्यासोबत माजी नगरसेवक चंद्रकांत पाटील, विवेक पाटील, राजू शिंदे, संदीप सुतार हेही होते. यामुळे पुन्हा भाजपला खिंडार पडणार असल्याचे स्पष्ट झाले आहे. राष्ट्रवादी काँगे्रसने भाजपमध्ये गेलेल्या इतरही नगरसेवकांना पुन्हा पक्षात घेण्यासाठी प्रयत्न सुरू केले आहेत. कोपरखैरणेमधील माथाडी संघटनेशी संबंधित असलेला एक नगरसेवक व एक माजी नगरसेविकाही लवकरच स्वगृही परत येईल अशी चर्चा आहे.
विधानसभा निवडणुकीपूर्वी माजी मंत्री गणेश नाईक यांनी ४८ नगरसेवकांसह भाजपमध्ये प्रवेश केला होता. विधानसभा निवडणुकीमध्ये ऐरोली व बेलापूर या दोन्ही मतदारसंघांमधून अनुक्रमे संदीप नाईक व गणेश नाईक यांना तिकीट दिले जाईल अशी अपेक्षा होती. परंतु पक्षाने गणेश नाईक यांच्याऐवजी मंदा म्हात्रे यांच्यावर विश्वास दाखवून नाईक समर्थकांना धक्का दिला होता. शेवटच्या क्षणी संदीप नाईक यांनी त्याग केल्यानंतर ऐरोली मतदारसंघातून गणेश नाईक यांना उमदेवारी दिली होती. विधानसभा निवडणुकीनंतर राज्यात महाविकास आघाडीचे सरकार आल्यामुळे भाजपमध्ये गेलेल्या नगरसेवकांनी शिवसेना व राष्ट्रवादीमध्ये प्रवेश करण्यास सुरुवात केली आहे. आतापर्यंत पाच नगरसेवकांनी शिवसेनेत व तीन विद्यमान नगरसेवकांनी राष्ट्रवादीमध्ये जाण्याचा निर्णय घेतला असून, हा भाजपला मोठा धक्का आहे. भाजपनेही शिवसेनेसह काँगे्रस व राष्ट्रवादीच्या पदाधिकाऱ्यांना फोडण्याची तयारी सुरू केली असून, योग्य वेळी धमाका केला जाईल, असे भाजपच्या काही पदाधिकाऱ्यांनी स्पष्ट केले आहे.
कुलकर्णी सोमवारी देणार राजीनामा
स्थायी समितीचे माजी सभापती व माजी मंत्री गणेश नाईक यांचे कट्टर समर्थक म्हणून ओळख असलेले सुरेश कुलकर्णी पाच नगरसेवकांना व परिवहन समितीच्या माजी सभापतींना घेऊन शिवसेनेत प्रवेश करणार आहेत. सोमवारी होणाºया महापालिकेच्या सर्वसाधारण सभेपूर्वी ते नगरसेवकपदाचा राजीनामा देणार आहेत.

विधानसभा निवडणुकीपूर्वी राष्ट्रवादी काँगे्रसच्या नगरसेवकांवर दबाव टाकून भाजपमध्ये प्रवेश करण्यास लावला होता. यामधील अनेक नगरसेवक घरवापसी करणार आहेत. गुरुवारी तीन नगरसेविका व चार माजी नगरसेवकांनी उपमुख्यमंत्री अजित पवार यांची भेट घेतली असून, अजून काही नगरसेवक निवडणुकीपूर्वी घरवापसी करतील.
- अशोक गावडे,
जिल्हा अध्यक्ष, राष्ट्रवादी काँगे्रस

भारतीय जनता पक्षातील एकही नगरसेवक अद्याप इतर पक्षामध्ये गेलेला नाही. ज्यांना महापालिका निवडणुकीमध्ये पक्षाचे तिकीट मिळणार नाही अशी भीती आहे ते स्वार्थासाठी इतर ठिकाणी जाण्याची चाचपणी करत असून त्याचा पक्षाच्या ताकदीवर काहीही परिणाम होणार नाही. इतर पक्षाचेही अनेक ज्येष्ठ पदाधिकारी आमच्या संपर्कात आहेत.
- रामचंद्र घरत,
जिल्हा अध्यक्ष,
भाजप