डंपरच्या धडकेत महिलेचा मृत्यू

भरधाव डंपरच्या धडकेत महिलेच्या मृत्यूची घटना रविवारी मध्यरात्री तुर्भेनाका येथे घडली आहे. तुर्भे गावात राहणारे दाम्पत्य

लोकमत न्यूज नेटवर्क
नवी मुंबई : भरधाव डंपरच्या धडकेत महिलेच्या मृत्यूची घटना रविवारी मध्यरात्री तुर्भेनाका येथे घडली आहे. तुर्भे गावात राहणारे दाम्पत्य मोटारसायकलवरून जात असताना, त्यांना पाठीमागून डंपरने धडक दिली. यामध्ये मोटारसायकलचालक पती गंभीर जखमी झाला असून पत्नीचा जागीच मृत्यू झाला.
संगीता रमेश चौधरी (२४), असे अपघातामध्ये मृत्यू झालेल्या महिलेचे नाव आहे. रविवारी मध्यरात्री त्या पती रमेश यांच्यासोबत मोटारसायकलवरून ठाणे-बेलापूर मार्गाने चालल्या होत्या. या वेळी तुर्भेनाका येथे पाठीमागून आलेल्या डंपरने त्यांना धडक दिली. यामध्ये दोघेही मोटारसायकलवरून पडून जखमी झाले होते. मात्र, अपघातानंतर डंपरचालकाने घटनास्थळी न थांबता डंपरसह पळ काढला. अखेर काही प्रत्यक्षदर्शींनी दोघांनाही उपचारासाठी रुग्णालयात दाखल केले. या वेळी डॉक्टरांनी संगीता यांना मृत घोषित केले. सोमवारी सकाळी या अपघाताची नोंद तुर्भे एमआयडीसी पोलीस ठाण्यात झाली असून, पळालेल्या डंपरचालकाविरोधात गुन्हा दाखल करण्यात आला आहे.

कंटेनरची एसटीला धडक

कळंबोली : पनवेलहून साई गावाकडे जाणाऱ्या एसटी बसला पेणहून येणाऱ्या कंटेनरने धडक दिल्याने तिघे जखमी झाले.
मुंबई-गोवा महामार्गावर रविवारी रात्री हा अपघात घडला. जखमींना तारा येथील युसूफ मेहरअली सेंटरमधील दवाखान्यात दाखल करण्यात आले. सुट्टीचा दिवस असल्याने फक्त तीनच प्रवासी या बसमध्ये प्रवास करीत होते. वैभव मोरे, सुरेश कापडे, प्रवीण (पूर्ण नाव समजू शकलेले नाही), अशी जखमींची नावे आहेत.