स्पोर्ट्स बाइकची धूम ठरली अखेरची

पामबीच मार्गावर अपघात : तोल गेल्याने दुभाजकाला धडक

नवी मुंबई :  मित्राने नवीनच घेतलेल्या सुपर बाइकवरची धूम जिवावर बेतल्याचा प्रकार सोमवारी पामबीच मार्गावर घडला. तळोजा येथे राहणाऱ्या स्वप्निल झिंगाडे (२६) हा सुपर बाइकची धूम ठोकत असताना हा अपघात झाला. 

कोपरखैरणे येथे राहणाऱ्या अरबाज अन्सारी याने हायाबुसा ही सुपरबाइक घेतली होती. ती पाहण्यासाठी त्याचाच तळोजा येथील मित्र स्वप्निल चंद्रकांत झिंगाडे (२६) हा कोपरखैरणेला आला होता. दोघेही बायकर असून, जुने मित्र आहेत. त्यामुळे स्वप्निल हा सुपर बाइकची पहिली राइड घेण्यासाठी पामबीच मार्गावर आला होता. पामबीचमार्गे तो सीबीडीच्या दिशेने जात असताना, नेरुळ तलावालगत त्याचा तोल गेला. यामुळे बाइक उजवीकडे कलंडली असता, स्वप्निल हा खाली पडून रस्त्याच्या दुभाजकावरील तारेत अडकून पडला, तर मोटरसायकल सुमारे २०० मिटर अंतरापर्यंत घासत गेली. हा अपघात पाहताच प्रत्यक्षदर्शी व वाहतूक पोलिसांनी त्या ठिकाणी धाव घेतली. मात्र, दुभाजकावर आदळल्याने स्वप्निलचा मृत्यू झाल्याचे वरिष्ठ निरीक्षक श्याम शिंदे यांनी सांगितले. 

ताबा सुटल्याने दुर्घटना
अपघाताच्या वेळी सुपर बाइक अधिक वेगात होती. त्यामुळे स्वप्निलचा ताबा सुटल्याने हा अपघात घडला. या प्रकरणी नेरुळ पोलीस ठाण्यात अपघाताची नोंद करण्यात आली आहे.