Navi Mumbai: पळस्पेमधून ६ लाख ८८ हजाराचा गांजा जप्त, दोघांना अटक

Navi Mumbai: अमली पदार्थ विरोधी पथकाने पळस्पे येथे सापळा रचून दोघांवर कारवाई केली आहे. त्यांच्याकडून ६ लाख ८८ हजार रुपये किमतीचा ३४ किलो ४०० ग्रॅम गांजा मिळून आला आहे. याप्रकरणी नवीन पनवेल पोलिस ठाण्यात गुन्हा दाखल करण्यात आला आहे. 

-  सूर्यकांत वाघमारे

नवी मुंबई - अमली पदार्थ विरोधी पथकाने पळस्पे येथे सापळा रचून दोघांवर कारवाई केली आहे. त्यांच्याकडून ६ लाख ८८ हजार रुपये किमतीचा ३४ किलो ४०० ग्रॅम गांजा मिळून आला आहे. याप्रकरणी नवीन पनवेल पोलिस ठाण्यात गुन्हा दाखल करण्यात आला आहे. 

पळस्पे परिसरात दोघेजण गांजाच्या व्यवहारासाठी येणार असल्याची माहिती अमली पदार्थ विरोधी पथकाला मिळाली होती. त्यानुसार वरिष्ठ निरीक्षक नीरज चौधरी यांनी सहायक निरीक्षक निलेश धुमाळ, उपनिरीक्षक कुलदीप मोरे, उत्तम लोखंडे, विजय पाटील, संजय फुलकर आदींचे पथक केले होते. या पथकाने गुरुवारी रात्री पळस्पे परिसरात सापळा रचला होता. त्यामध्ये संशयित वर्णनाची कार अडवून कारमधील दोघांची चौकशी करण्यात आली. यावेळी त्यांच्यावर संशय आल्याने कारची झडती घेतली असता, कारमध्ये दोन बॅगमध्ये भरून ठेवलेला ३४ किलो ४०० ग्रॅम गांजा आढळून आला. बाजारभावानुसार त्याची किंमत ६ लाख ८८ हजार रुपये आहे. याप्रकरणी दोघांवर नवीन पनवेल पोलिस ठाण्यात गुन्हा दाखल करण्यात आला आहे. त्यांच्याकडील कार देखील जप्त करण्यात आली आहे. तर या दोघांच्या माध्यमातून पुढील सूत्रधारापर्यंत पोहचण्याचा प्रयत्न अमली पदार्थ विरोधी पथक करत आहे.