नवी मुंबई: एपीएमसीतून तीन वर्षीय मुलीचे अपहरण 

एपीएमसी परिसरातून तीन वर्षीय मुलीच्या अपहरणाची घटना घडली होती.

नवी मुंबई: एपीएमसी परिसरातून तीन वर्षीय मुलीच्या अपहरणाची घटना घडली होती. मात्र घटनेनंतर पोलिस तात्काळ संबंधितांच्या मागावर असतानाच त्यांनी सदर मुलीला परत सोडून पळ काढला. यादरम्यान तिच्यासोबत अनुचित कृत्य घडले नसून त्यांनी कोणत्या कारणांनी तिचे अपहरण केले याचा उलगडा करण्यासाठी पोलिस त्यांचा शोध घेत आहेत. 

एपीएमसी मधील पुनीत कॉर्नर झोपडपट्टी परिसरात हि घटना घडली आहे. परिसरात राहणारी ३ वर्षीय मुलगी रस्त्यालगत खेळत असताना एक दुचाकीस्वार त्याठिकाणी आला. त्याने मुलीला खायला देण्याचे आमिष दाखवून दुचाकीवर बसवून नेले होते. हा प्रकार पालकांच्या निदर्शनात येताच त्यांनी एपीएमसी पोलिसांकडे तक्रार केली. त्यानुसार वरिष्ठ निरीक्षक अजय शिंदे यांनी तातडीने मुलीच्या शोधासाठी पथके तयार केली होती. त्यामध्ये दुचाकीच्या माहितीवरून संशयित तरुणांच्या घरापर्यंत पोलिस पोहचले होते. त्याचवेळी पोलिस आपल्या मागावर असल्याचे तरुणाला समजताच त्याने रात्री १० च्या सुमारास सदर मुलीला परत त्याच परिसरात सोडून पळ काढला. यावेळी मुलीसोबत गैर कृत्य घडले आहे का हे तपासण्यासाठी पोलिसांनी तिची वैद्यकीय तपासणी केली असता तिच्यासोबत काही घडले नसल्याचे स्पष्ट झाले. यामुळे नेमके कोणत्या कारणांनी तिचे अपहरण केले होते असा प्रश्न पोलिसांना पडला आहे. त्यासाठी संबंधित तरुणाच्या मागावर पोलिस आहेत. याप्रकरणी एपीएमसी पोलिस ठाण्यात संबंधितांवर अपहरणाचा गुन्हा दाखल करण्यात आला आहे.