बलात्कारी बापाला जन्मठेप

स्वत:च्या अल्पवयीन मुलीवर वर्षभर बलात्कार करणाऱ्या बापाला वसई कोर्टाने जन्मठेप सुनावली. सत्र न्यायाधीश एन.आर.प्रधान

वसई : स्वत:च्या अल्पवयीन मुलीवर वर्षभर बलात्कार करणाऱ्या बापाला वसई कोर्टाने जन्मठेप सुनावली. सत्र न्यायाधीश एन.आर.प्रधान यांनी त्याला दहा हजार रुपये दंड तसेच तो न भरल्यास सहा महिन्यांच्या अतिरिक्त कारावासाची शिक्षा ठोठावली. २०१४ मध्ये वसई पश्चिमेकडील आनंदनगरमध्ये असलेल्या रमाबाई नगर झोपडपट्टीत पिता-कन्येच्या पवित्र नात्याला काळीमा फासणारी ही घटना घडली होती.
सय्यद शब्बीर सहा आपल्या पंधरा वर्षीय मुलीवर वर्षभरापासून तिचे हात-पाय बांधून व तोंडावर पट्टी बांधून अत्याचार करायचा. पिडित मुलगी वेळोवेळी प्रतिकार करीत होती. याला वाचा फोडण्यासाठी तिने एका समाजसेविकेला गाठून पापाचा पाढा वाचला होता. याप्रकरणी माणिकपूर पोलीस ठाण्यात पिडित मुलीच्या तक्रारीवरुन आरोपी सय्यद शबीर सहा याच्यावर बलात्काराचा गुन्हा दाखल करण्यात आला होता. तत्कालीन माणिकपूर पोलीस निरिक्षक के.एस.हेगाजे यांनी आरोपीच्या मुसक्या आवळल्या होत्या.
आज न्या.एन.आर. प्रधान यांनी पोलीसांनी सादर केलेले साक्षीपुरावे, वैद्यकीय तज्ज्ञांचा अहवाल, सरकारी व प्रतिपक्षाच्या वकीलांनी सादर केलेला युक्तीवाद पडताळल्यानंतर आरोपीला आजन्म कारावासाची शिक्षा सुनावली. खटल्यामध्ये सरकारी वकील उज्ज्वला मोहळकर यांनी उत्तम युक्तीवाद सादर करुन पिडित मुलीला न्याय मिळवून दिला. (प्रतिनिधी)