लोकमत न्यूज नेटवर्कनवी मुंबई : कार्यकाळ पूर्ण झाल्याने चार वरिष्ठ पोलीस निरीक्षकांची इतरत्र बदली करण्यात आली आहे, तर बदलीवर आलेल्या नव्या पोलीस निरीक्षकांची विविध पोलीस ठाण्यात नियुक्ती करण्यात आली आहे. पोलीस आयुक्तालयाअंतर्गत पोलीस निरीक्षकांच्या बदल्या करण्यात आल्या आहेत. त्यामध्ये चार वरिष्ठ निरीक्षकांचा सध्याच्या ठिकाणचा कार्यकाळ पूर्ण झाल्यामुळे इतरत्र बदली करण्यात आली आहे. तर बदलीवर आलेल्या नव्या पोलीस निरिक्षकांची आवश्यकता असलेल्या पोलीस ठाण्यात नेमणूक करण्यात आली आहे. बदली झालेल्या वरिष्ठ निरीक्षकांमध्ये कोपरखैरणेचे वरिष्ठ निरीक्षक सतीश गायकवाड, सीबीडी पोलीस ठाण्याच्या वरिष्ठ निरीक्षक मीरा बनसोडे, महिला सहाय्यता कक्षाच्या वरिष्ठ निरीक्षक संगीता अल्फांसो-शिंदे व प्रशासन विभागाचे वरिष्ठ निरीक्षक संदिपान शिंदे यांचा समावेश आहे. गायकवाड यांची कोपरखैरणेतून वाशी वाहतूक शाखेच्या वरिष्ठ निरीक्षकपदी बदली करण्यात आली आहे. तर बदली होवून आलेले भरत कांबळे यांच्याकडे कोपरखैरणे पोलीस ठाण्याचा पदभार देण्यात आला आहे. संदिपान शिंदे यांच्याकडे अधिकराव पोळ यांच्या बदलीनंतर रिक्त असलेल्या गुन्हे शाखा कक्ष १ च्या वरिष्ठ निरीक्षकपदाचा कार्यभार देण्यात आला आहे. तर अल्फांसो यांची सीबीडी पोलीस ठाण्याच्या वरिष्ठ निरीक्षकपदी व त्यांच्या जागी बनसोडे यांची नियुक्ती करण्यात आली आहे. त्याशिवाय सीबीडी वाहतूक शाखेच्या वरिष्ठ निरीक्षक ममता डिसोजा यांची रबाळे वाहतूक शाखा व त्यांच्या जागी अभिजित मोहिते यांची नियुक्ती करण्यात आली आहे. वाशी पोलीस ठाण्याचे निरीक्षक चेतन काकडे यांची न्हावाशेवा पोलीस ठाण्याच्या वरिष्ठ निरीक्षकपदी तर शहाजी जाधव यांची एनआरआय पोलीस ठाण्याच्या वरिष्ठ निरीक्षकपदी नेमणूक करण्यात आली आहे. तर स्मिता जाधव यांची अमली पदार्थ विरोधी पथकामध्ये नेमणूक करण्यात आली आहे. त्याचप्रमाणे बदलीवर आलेल्या निरीक्षकांपैकी नितीन गीते व किसन गायकवाड वाशी, बापूराव देशमुख यांची कामोठे, अर्जुन गरड यांची सानपाडा, दत्तात्रय किंद्र यांची न्हावाशेवा, मोहन पाटील यांची सीबीडी, शशिकांत विश्वकार यांची पनवेल शहर पोलीस ठाण्यात नियुक्ती करण्यात आली आहे.
वरिष्ठ पोलीस निरीक्षकांच्या बदल्या
By admin | Published: May 13, 2017 1:17 AM