अपघात टाळण्याच्या प्रयत्नात टेम्पो पलटला; सायन पनवेल मार्गावरील घटना 

सायन पनवेल मार्गावर सानपाडा येथील पादचारी पुलालगत गुरुवारी दुपारी हा अपघात घडला.

लोकमत न्यूज नेटवर्क

नवी मुंबई : अपघात टाळण्याच्या प्रयत्नात टेम्पो पलटल्याची घटना सायन पनवेल मार्गावर सानपाडा येथे घडली. यामध्ये चालक किरकोळ जखमी झाला असून टेम्पोचे मोठे नुकसान झाले आहे. समोरील कारने अचानक ब्रेक दाबल्याने हा अपघात घडला. 

सायन पनवेल मार्गावर सानपाडा येथील पादचारी पुलालगत गुरुवारी दुपारी हा अपघात घडला. नेरुळ येथून दूध घेऊन सानपाडा येथील डेअरीत जाणाऱ्या टेम्पो सोबत अपघात झाला. पुलाखालील लेनवर जाण्यासाठी चालकाने टेम्पो डावीकडे वळवला होता. त्यावेळी समोर धावणाऱ्या कार चालकाने कार थांबवण्यासाठी अचानक ब्रेक दाबला. यामुळे टेम्पो कारला धडकून अपघाताची शक्यता निर्माण झाली होती. यामुळे टेम्पो चालकाने टेम्पो तातडीने उजवीकडे वळवण्याचा प्रयत्न केला असता टेम्पो पलटी होऊन काही अंतरापर्यंत घासत गेला. यावेळी टेम्पो लगत इतर वाहन नव्हते, यामुळे मोठी दुर्घटना टळली. तर अपघातानंतर परिसरात उभ्या असलेल्या नागरिकांनी घटनास्थळी धाव घेत चालकाला सुखरूप बाहेर काढले.

अपघातामध्ये त्याला गंभीर दुखापत झाली नाही. मात्र टेम्पोचे मोठ्या प्रमाणात नुकसान झाले आहे. अपघाताची माहिती मिळताच सानपाडा पोलिस व तुर्भे वाहतूक शाखेच्या वाहतूक पोलिसांनी त्याठिकाणी धाव घेऊन रस्त्यावरून अपघातग्रस्त टेम्पो हटवला.