पदयात्रा, गाठीभेटी, सोशल मीडियाचा वापर

पनवेल महापालिकेच्या निवडणुकीसाठी उमेदवारांनी प्रचारास जोरदार सुरुवात केली आहे. प्रत्येक प्रभागात मतदारांच्या

मयूर तांबडे ।
लोकमत न्यूज नेटवर्क
पनवेल : पनवेल महापालिकेच्या निवडणुकीसाठी उमेदवारांनी प्रचारास जोरदार सुरुवात केली आहे. प्रत्येक प्रभागात मतदारांच्या बैठका व कोपरा सभांच्या माध्यमातून मोर्चेबांधणी सुरू झाली आहे. महापालिकेच्या पहिल्याच निवडणुकीसाठी उमेदवार वेगवेगळे फंडे वापरताना दिसत आहेत.
उमेदवारांनी प्रभागांमध्ये पदयात्रा काढून मतदारांच्या गाठीभेटी घेण्यास सुरुवात केली आहे. दहा दिवसांवर येऊन ठेपलेल्या पनवेल महानगरपालिका निवडणुकीच्या प्रचाराने वेग घेतला आहे. प्रमुख राजकीय पक्षांच्या उमेदवारांसह अपक्ष उमेदवारांनी प्रचारफेऱ्या काढून मतदारांना विविध मार्गाने आकर्षित करण्याचा सपाटाच लावला आहे. पक्षाकडून अधिकृत उमेदवारी मिळाल्याने काहींनी आठ दिवस अगोदरपासूनच प्रचाराला जोरदार सुरुवात केली होती. दररोज, सकाळी आणि संध्याकाळी तीन तास, शनिवार आणि रविवार सुटीचा मुहूर्त साधून उमेदवारांनी प्रचारफेऱ्या काढून मतदारांशी संवाद साधत प्रचाराचा धूमधडाका सुरू ठेवला आहे.
यंदा सोशल मीडियावरही प्रचाराचे वादळ उठले आहे. बहुतेक सर्व उमेदवारांनी व्हॉट्सअ‍ॅप, फेसबुक अशा माध्यमाचा प्रभावी वापर केला आहे. विभागातील महत्त्वाच्या व्यक्तींद्वारे आपले संदेश वेगवेगळ्या ग्रुप्सपर्यंत पोहोचण्यापासून फोटो डेटाबेससारख्या सर्व अस्त्रांचा वापर पहिल्यांदाच इतक्या प्रभावीपणे होत आहे. अगदी छोटे पक्ष आणि अपक्ष उमेदवारही सोशल मीडियाचा प्रभावी वापर करताना दिसत आहेत. प्रचाराची कोणतीही संधी इच्छुक सोडत नाहीत. मग त्यासाठी डिजिटलपासून अगदी घरोघरी जाऊन प्रचार करण्यात येत आहे. मतदारांवर छाप पाडण्याची इच्छुकांची हालचाल चालू आहे. पाच वर्षांनी होणाऱ्या निवडणुकीत प्रचाराचे फंडे बदलत आहे.
विरोधी पक्षाच्या हालचाली जाणून घेण्यासाठी राजकीय नेत्यांनी डिटेक्टिव्ह एजन्सीचे दरवाजे ठोठावलेत. डिटेक्टिव्ह एजन्सींना एका दिवसासाठी ५ ते १0 हजार रु पये फी दिली की, विरोधी पक्षाच्या गोटात काय हालचाली सुरू आहेत, त्यांचे प्रचाराचे फंडे काय आहेत, आपल्या विरोधात कुठली कटकारस्थाने रचली जाताहेत, अशा एक ना अनेक गोष्टींची माहिती मिळते. ‘व्हॉटसअ‍ॅप’ वापरत नसणाऱ्या मतदारांना ‘एसएमएस’द्वारे संपर्क साधला जात आहे. बहुतांशी उमेदवारांच्या यादीत पत्रकारांचा समावेश हमखास असल्याने उमेदवारांच्या कार्यक्र मांची रूपरेषा घरबसल्या पत्रकारांना मिळत आहे. सोशल मीडियाचा हा मारा दुपारच्या वेळेत आणि रात्री उशिरा उमेदवार खुद्द पोस्ट करून करीत आहेत. कारण रखरखत्या या उन्हात प्रचारासाठी बाहेर पडण्याचे टाळले जात आहे. त्यामुळे सकाळ, संध्याकाळच्या वेळेत घरोघरी संपर्क अभियानावर उमेदवारांनी भर दिला आहे.
स्मार्ट सिटीकडे वाटचाल करू पाहणाऱ्या व प्रथमच होत असलेल्या पनवेल महानगरपालिकेच्या निवडणुकीत ७८ जागांसाठी तब्बल ४१८ जणांनी भावी नगरसेवक बनण्यासाठी कंबर कसली आहे. प्रमुख समजल्या जाणाऱ्या शेकाप, काँग्रेस, भाजपा, राष्ट्रवादी आणि शिवसेना अशी तिरंगी लढत होतेय. त्यात अन्य पक्ष आणि नाराज मंडळींनी सवतासुभा करून अपक्ष उमेदवारी दाखल केली आहे. प्रत्येकाने प्रचारामध्ये अनोखे फंडे वापरण्यास प्रारंभ केला आहे. शहरात जिकडे पाहावे तिकडे वाहनांवर ध्वनिक्षेपकाद्वारे प्रचाराने माहोल तापला आहे.
इच्छुकांपैकी १५४ जणांनी माघार घेतल्याने ४१८ उमेदवार रिंगणात-
पनवेल महापालिकेची निवडणूक येत्या २४ मे रोजी होत आहे. या निवडणुकीसाठी ५७२ जणांनी उमेदवारी अर्ज भरले होते. गुरुवारी अर्ज मागे घेण्याचा शेवटचा दिवस होता. यादिवशी १५४ जणांनी जणांनी अर्ज मागे घेतल्याने आता ४१८ उमेदवार निवडणूक रिंगणात आहेत.
पक्षाकडून अधिकृत उमेदवारी न मिळाल्याने महाआघाडी आणि भाजपाच्या बंडखोरांनी बंडखोरी करीत उमेदवारी अर्ज भरले होते. मात्र या बंडखोरांची मनधरणी करण्यात दोन्ही पक्षांना यश आल्याने मोठ्या प्रमाणात बंडखोर थंड झाले आहेत.
बंडखोरांमध्ये सर्वात जास्त संख्या भाजपाच्या कार्यकर्त्यांची होती. मात्र भाजपाचे नेते माजी खासदार रामशेठ ठाकूर यांनी बंडखोरांशी वैयक्तिक संपर्क साधून विनवणी केल्यानंतर प्रयत्नांना यश आले आहे. पनवेल महापालिका क्षेत्रातील २० प्रभागात ७८ जागेसाठी ही लढत होत आहे.