आज रंगणार आयपीएलचा लिलाव

इंडियन प्रिमिअर लीगच्या (आयपीएल) आठव्या सत्रासाठी सोमवारी खेळाडूंवर बोली लावण्यात येणार आहे़ भारताचा अनुभवी खेळाडू युवराज सिंग, दक्षिण आफ्रिकेचा फॉर्मात असलेला

बंगळुरू : इंडियन प्रिमिअर लीगच्या (आयपीएल) आठव्या सत्रासाठी सोमवारी खेळाडूंवर बोली लावण्यात येणार आहे़ भारताचा अनुभवी खेळाडू युवराज सिंग, दक्षिण आफ्रिकेचा फॉर्मात असलेला क्रिकेटपटू हाशीम आमला यांच्यावर सर्वांची नजर असेल़ गत आयपीएलमध्ये युवराज सिंगला रॉयल चॅलेंजर्स बंगळुरूने १४ कोटी रुपयांत खरेदी केले होते़ या वेळीही त्याला एवढी किंमत मिळते किंवा याकडे सर्वांची नजर असेल़ याव्यतिरिक्त दिल्ली डेअर डेव्हिल्सचा कर्णधार केविन पीटरसन आणि या संघातील सर्वांत महागडा खेळाडू दिनेश कार्तिक यांच्यावरही बोली लागेल़ आफ्रिकेचा हाशीम आमला सध्या जबरदस्त फॉर्ममध्ये आहे, त्यामुळे सर्व संघ मालक त्याला आपल्या संघात घेण्यासाठी प्रयत्नशील असतील, तसेच भारताचा मुरली विजय, श्रीलंकेचा महेला जयवर्धने, कुमार संगकारा, एंजेलो मॅथ्यूज, इंग्लंडचा इयान मॉर्गन, एलेक्स हेल्स आणि आॅस्ट्रेलियाचा सलामीवीर फलंदाज अ‍ॅरोन फिंच यांच्यावर मोठी बोली लागण्याची शक्यता आहे़ या लिलावापूर्वी १२२ क्रिकेटपटूंना संघांनी २०१५ च्या सत्रासाठी कायम ठेवले आहे़ त्यात ७८ भारतीय आणि ४४ विदेशी खेळाडूंचा समावेश आहे़ या वर्षी प्रत्येक फ्रँचायजीला ६३ कोटी रुपये मिळाले आहेत़ ही रक्कम गत सत्रापेक्षा ५ टक्क्यांनी अधिक आहे़ आयपीएलचे आठवे सत्र ८ एप्रिलपासून सुरू होणार आहे़ (वृत्तसंस्था)