- ऑनलाइन लोकमत
मुंबई, दि. 27 - सामन्याच्या सहाव्या मिनिटाला अरहान ठक्करने लगावलेल्या गोलच्या जोरावर मुंबई शहर जिल्हा संघाने कोल्हापूर जिल्हा संघाचा १-० असा पराभव केला. या विजयाच्या जोरावर मुंबई संघाने प्रतिष्ठेच्या समजल्या जाणाऱ्या सुब्रतो चषक फुटबॉल स्पर्धेत अजिंक्यपद पटकावले.
भिवंडी येथील ऑल सेंट शाळेच्या मैदानात रंगलेल्या सामन्यात मुंबई संघाने आक्रमक सुरुवात केली. सामन्याच्या सहाव्या मिनिटालाच अरहान ठक्करने प्रतिस्पर्धी बचावपटूंना भेदत गोलरक्षकाला चकमा देत सुंदर गोल झळकावला. अरहानच्या गोलमुळे मुंबई संघाने १-० अशी आघाडी घेत सामन्यावर वर्चस्व राखले. मध्यांतरानंतर कोल्हापूर संघाच्या खेळाडूंनी सामन्यात परतण्यासाठी प्रयत्न केले. मात्र मुंबईविरुद्ध गोल नोंदविण्यात त्यांना अपयश आले. परिणामी पूर्णवेळेअंती मुंबई संघाने सामन्यात १-० असा विजय मिळवत सुब्रतो चषकावर नाव कोरले. तत्पर्वी मुंबई संघाने उपांत्य फेरीत अमरावती संघाचा २-० असा धुव्वा उडवला होता.
शहरातील कॅथड्रिल अ‍ॅन्ड जॉन कॅनन शाळेतील १४ वर्षांखालील संघ मुंबई संघाचे प्रतिनिधित्व करत होता. स्पर्धेत विजय मिळवल्यानंतर कॅथड्रिल शाळेचा संघ सप्टेंबरमध्ये दिल्ली येथे होणाऱ्या राष्ट्रीय फुटबॉल स्पर्धेत महाराष्ट्राचे नेतृत्व करणार आहे.