पेस, क्लासेन उपांत्य फेरीत

रावेन क्लासेन या जोडीने महेश भूपती आणि साकेत मिनैनी या जोडीवर शानदार विजय मिळवीत चेन्नई ओपन टेनिस स्पर्धेच्या दुहेरीच्या उपांत्य फेरीत प्रवेश केला़

चेन्नई : भारताचा अनुभवी टेनिसपटू लिएंडर पेस आणि दक्षिण आफ्रिकेचा रावेन क्लासेन या जोडीने महेश भूपती आणि साकेत मिनैनी या जोडीवर शानदार विजय मिळवीत चेन्नई ओपन टेनिस स्पर्धेच्या दुहेरीच्या उपांत्य फेरीत प्रवेश केला़ उपांत्यपूर्व फेरीत पेस आणि क्लासेन या अव्वल मानांकन प्राप्त जोडीने पहिला सेट गमावल्यानंतर जोरदार मुसंडी मारताना भूपती आणि मिनैनी या भारतीय जोडीला १ तास १५ मिनिटांपर्यंत रंगलेल्या सामन्यात १-६, ६-१, १०-७ अशा फरकाने धूळ चारत थाटात सेमीफायनलचे तिकीट पक्के केले़ उपांत्य फेरीच्या सामन्यात आता पेस आणि क्लासेन या जोडीला पाब्लो कारेना बस्टा आणि गुलेरमो गर्सिया लोपेज या स्पॅनिश जोडीचा सामना करावा लागणार आहे़ या स्पॅनिश जोडीने लिथुवानियाचा रिकार्ड्स बरानकिस आणि क्रोएशियाचा मॅट पाविच यांच्यावर ६-४, ०-६, १०-४ अशी मात करीत उपांत्य फेरीत आपले स्थान निश्चित केले़ दरम्यान, भारताच्या पुरव राजा आणि कॅनडाचा त्याचा जोडीदार आदिल शम्सुदीन यांनी रॉबर्टो बातिस्ता आगुट आणि स्वीत्झर्लंडच्या स्टेनिसलास वावरिंका या जोडीवर ७-६, ४-६, १०-४ असा विजय मिळवून अंतिम चार खेळाडूंत जागा पक्की केली़ (वृत्तसंस्था)