आर. बालसुब्रमण्यम्, कुलकर्णी, मांढरेचा विजय

नूतन बुद्धिबळ मंडळ व सूरज स्पोर्टस् अकॅडमीच्यावतीने आयोजित सूरज फिडे मानांकन बुद्धिबळ स्पर्धेत पाचव्या फेरीअखेर

कुपवाड : नूतन बुद्धिबळ मंडळ व सूरज स्पोर्टस् अकॅडमीच्यावतीने आयोजित सूरज फिडे मानांकन बुद्धिबळ स्पर्धेत पाचव्या फेरीअखेर पुण्याचा चिन्मय कुलकर्णी, हेमंतकुमार मांढरे व तमिळनाडूचा आंतरराष्ट्रीय मास्टर आर. बालसुब्रमण्यम् संयुक्तपणे पाच गुणांसह प्रथम स्थानावर आहेत. या फेरीत आंतरराष्ट्रीय मास्टर चंद्रशेखर गोखले, केतन कुलकर्णी हे साडेचार गुणांसह संयुक्तपणे दुसऱ्या स्थानावर आहेत. कुपवाड औद्योगिक वसाहतीमधील कृष्णा व्हॅलीच्या क्रीडा संकुलामध्ये या सूरज आंतरराष्ट्रीय फिडे मानांकन बुद्धिबळ स्पर्धा होत आहेत. स्पर्धेत शुक्रवारी पाचव्या फेरीत पुण्याचा चिन्मय कुलकर्णी आणि निखिल दीक्षित यांच्यात झालेल्या डावात चिन्मयने निखिलचा पराभव केला. रवींद्र निकम आणि तमिळनाडूचा आंतरराष्ट्रीय मास्टर आर. बालसुब्रमण्यम् यांच्यातील डावात बालसुब्रमण्यम्ने रवींद्रचा पराभव केला. केदार जोशी व चंद्रशेखर गोखले यांच्यातील डावात चंद्रशेखरने केदारचा पराभव केला. हेमंतकुमार मांढरे व श्रीराज भोसले यांच्यातील डावात मांढरेने भोसलेचा पराभव केला. श्रीधर वेल्हाळ व पुण्याचा निखिल बिडकर यांच्यातील डाव बरोबरीत सुटला. याबरोबरच या फेरीत केतन कुलकर्णीने शुभम मालाणीचा, मुदस्सर पटेलने हर्ष भोबेचा, प्रसाद खेडकरने प्रदीप शिर्केचा, रोहित मोकाशीने रिद्धी उपासेचा पराभव करून आघाडी कायम केली. (वार्ताहर)