ऑनलाइन लोकमत
मुंबई, दि. 5 - मास्टर ब्लास्टर सचिन सध्या त्याच्या मोबाईल अॅपच्या प्रमोशनमध्ये व्यस्त आहे. प्रमोशनसाठी तो सध्या बऱ्याच ठिकाणी भेट देत आहे. सचिन तेंडुलकरचा बॉलिवूडचा बाजीराव रणवीर सिंग सोबतचा सेल्फी व्हिडिओ सोशल मीडियावर झपाट्याने व्हायरल होताना दिसतोय. सचिन तेंडुलकरने काल हा व्हिडिओ आपल्या फेसबुक पेजवर शेअर केला आहे. यामध्ये रणवीर आणि सचिन दोघांचाही अंदाज पाहण्यासारखा आहे. गेल्या आठवड्यात मुंबईत क्रिकेट क्लब ऑफ इंडियामध्ये "100एमबी" अ‍ॅपचं सचिनच्या हस्ते अनावरण करण्यात आल होतं.
सचिनने शेअर केलेल्या व्हिडिओमध्ये रणवीर 100 एमबी अॅप बद्दल माहिती सांगताना दिसतोय. अॅपमध्ये तुम्हाला काय काय मिळेल हे त्यांने सांगितले आहे. तसेच ते डाऊनलोड करण्याचं आवाहनही रणवीरने केले आहे. काही दिवसापुर्वी सचिन आणि गायक सोनू निगम यांचा गाणं गातानाचा व्हिडिओ व्हायरल झाला होता. त्यानंतर सोशल मीडियावर विविध प्रकराच्या चर्चा झाल्या होत्या.
क्रिकेटच्या मैदानावर चौकार, षटकारांचे "स्फोट" घडवून शतकांचं शतक करणारा सचिन "मास्टर ब्लास्टर" म्हणून प्रसिद्ध आहे. याच शब्दांची इंग्रजी आद्याक्षरे घेऊन सचिनच्या कार्यकर्तृत्वाला साजेसं असं नाव अ‍ॅपला देण्यात आलं आहे. 27 मार्च रोजी या अ‍ॅपचा व्हिडिओ यू ट्यूबवरही अपलोड करण्यात आला आहे. या व्हिडिओद्वारे सचिननं त्याच्या चाहत्यांशी संवाद साधला असून अॅपच्या माध्यमातून संपर्कात राहण्याचं आवाहनही केलं आहे. "सोशल मीडियावर माझ्याबद्दल येणाऱ्या सर्व प्रकारच्या बातम्या व माहिती तुम्हाला या अॅपमध्ये मिळेल, असं सचिननं म्हटलं आहे. सचिनशी सतत कनेक्ट राहण्यासाठी त्याच्या चाहत्यांना हे अॅप अत्यंत उपयुक्त ठरणार आहे.
सचिन लवकरच आपल्याला सिनेमागृहातही दिसणार आहे. 26 मे रोजी सचिन तेंडुलकरचा बायोपिक असलेला चित्रपट रिलीज होत आहे.