युसूफने लगावली प्रेक्षकाच्या कानशिलात !

: येथे सुरू असलेल्या जम्मू काश्मीरविरुद्धच्या रणजी चषक लढतीदरम्यान काल भारतीय खेळाडू आणि बडोदा संघाचा अष्टपैलू खेळाडू युसूफ पठाण

बडोदा : येथे सुरू असलेल्या जम्मू काश्मीरविरुद्धच्या रणजी चषक लढतीदरम्यान काल भारतीय खेळाडू आणि बडोदा संघाचा अष्टपैलू खेळाडू युसूफ पठाण याने मंगळवारी कथितरीत्या युवा प्रेक्षकाकडून झालेल्या अपमानास्पद शेरेबाजीनंतर संयम सोडीत चक्क त्याच्या कानशिलात लगावली. पठाण हा रिलायन्स क्रिकेट मैदानावर फलंदाजी करीत असताना युवा चाहत्याने शेरेबाजी केली. त्यावर नाराज झालेल्या युसूफचा संयम सुटला. बडोदा क्रिकेट संघटनेचे सचिव स्नेहेल पारीख यांनी दिलेल्या माहितीनुसार, हा चाहता पठाण आणि अन्य खेळाडूंवर असभ्य भाषेत शेरेबाजी करीत होता. तो जोरजोरात ओरडत होता़ शिवाय युसूफ आणि अंबाती रायुडू फलंदाजी करीत असताना त्यांच्याबद्दल वक्तव्ये करीत होता. पठाणला त्याचे ओरडणे सहन झाले नाही. बाद झाल्यानंतर त्या युवकाला युसूफने ड्रेसिंग रूममध्ये बोलावले आणि त्याला दोन थपडा मारल्या. ही घटना युसूफचा भाऊ इरफान पठाण याला कळताच तो ड्रेसिंग रूममध्ये दाखल झाला आणि परिस्थिती नियंत्रणात आणण्याचा त्याने प्रयत्न केला, असे पारीख यांनी सांगितले. (वृत्तसंस्था)