युवराज, मनप्रीत यांची झुंज अपयशी

अष्टपैलू युवराज सिंग आणि मनप्रीत सिंग ग्रेवाल यांच्या आक्रमक फटकेबाजीनंतरही बलाढ्य उत्तर विभागाला मध्य विभागाविरुद्ध अनपेक्षित पराभव

मुंबई : अष्टपैलू युवराज सिंग आणि मनप्रीत सिंग ग्रेवाल यांच्या आक्रमक फटकेबाजीनंतरही बलाढ्य उत्तर विभागाला मध्य विभागाविरुद्ध अनपेक्षित पराभव पत्करावा लागला. मध्य विभागाने दिलेल्या १६८ धावांचा पाठलाग करताना उत्तर विभागाची मजल ६ बाद १६३ धावा अशी मर्यादित राहिली. युवराजने १८ व्या षटकात ५२ धावांची आवश्यकता असताना सलग तीन षटकार ठोकून उत्तर विभागाच्या आशा उंचावल्या होत्या. त्याने २० चेंडूत चार षटकारांसह ३३ धावा केल्या. मनप्रीतनेही ९ चेंडूत २ चौकार व २ षटकारांसह नाबाद २३ धावांची आक्रमक खेळी केली. परंतु, संघाला विजयी करण्यात दोघेही अपयशी ठरले. कर्ण शर्माने उत्तर विभागाचे ३ महत्त्वपुर्ण बळी घेत मध्य विभागाच्या विजयात मोलाचे योगदान दिले. याआधी आशिष नेहरा (३/२६) आणि हरभजन सिंग (२/३५) यांनी मध्यचा डाव २० षटकात ७ बाद १६७ धावा असा रोखला. महेश रावत (नाबाद ५७) आणि कर्णधार नमन ओझा (४८) यांनी चांगली फटकेबाजी केली.