मानवत येथे ४३ वर्षीय महिलेचा खून

शहरातील फुले नगरात तब्बसुम बडेशहा शेख (वय ४३) ही महिला आपल्या मालकीच्या घरात एकटी राहत होती. तसेच ही महिला मागील काही वर्षांपासून वेश्या व्यवसाय करीत होती, अशी माहिती पोलिसांनी दिली. २१ फेब्रुवारी रोजी रात्री ८ च्या सुमारास शेजारी राहणारी महिला तब्बसुम यांच्याबरोबर बोलण्यासाठी गेली असता, त्या जमिनीवर संशयास्पद अवस्थेत पडलेल्या त्यांना दिसल्या. नागरिकांनी घटनेची माहिती पोलिसांना दिल्यानंतर सपोनि भरत जाधव, जमादार अनिल केंद्रे, नारायण सोळंके, महिला पोलीस कर्मचारी सविता भारशंकर, निर्मला गायकवाड यांनी घटनास्थळी धाव घेतली. घरातील खोलीची पाहणी केली असता, तब्बसूम या खोलीमध्ये मृतावस्थेत आढळून आल्या. तसेच त्यांच्या खोलीमधील सर्व सामान अस्ताव्यस्त पडलेले आढळून आल्याने घातपात झाल्याचा संशय पोलिसांना आला. घटनेचे गांभीर्य लक्षात घेऊन पोलिसांनी ठसेतज्ज्ञ आणि श्वानपथकाला पाचारण केले. श्वानपथकाने पशुवैद्यकीय दवाखाना मुख्य रस्त्यापर्यंत माग काढल्याची माहिती पोलिसांनी दिली. याप्रकरणी सपोनि भरत जाधव यांच्या तक्रारीवरून अज्ञात व्यक्तीविरुद्ध खुनाचा गुन्हा दाखल करण्यात आला आहे. या प्रकरणाचा अधिक तपास पोलीस निरीक्षक रमेश स्वामी करीत आहेत.