चोरी गेलेल्या ट्रॅक्टरचा शोध लागेना

सेलू येथील महसूल विभागाच्या पथकाने २० मे रोजी पिंपरी खुर्द ते शिराळा रस्त्यावर अवैधरीत्या एक ब्रास वाळू घेऊन जाणारा व पासिंग नंबर खोडलेला एक ट्रॅक्टर पकडला होता. यावेळी ट्रॅक्टरचालक पथकास पाहून पळून गेला होता. त्यावेळी महसूल कर्मचा-यांनी २० मे रोजी ट्रॅक्टर जप्त करून तो सेलू येथील तहसील कार्यालयाच्या प्रांगणात आणून लावला होता. २ जून रोजी सकाळी हा ट्रॅक्टर जागेवर दिसून आला नाही. त्यानंतर ७ जून रोजी तलाठी अविनाश अरुण जोगे यांनी सेलू पोलिसात याबाबत फिर्याद दिली. त्यावरून अज्ञात चोरट्याविरुद्ध गुन्हा दाखल करण्यात आला आहे. विशेष म्हणजे सेलू तहसील कार्यालय हे सीसीटीव्ही कॅमे-याच्या निगराणीत असताना चोरी गेलेल्या ट्रॅक्टरला पंधरा दिवसांचा कालावधी उलटला तरी सेलू पोलिसांना तपास लागला नाही.