Dream Astrology: स्वप्नात 'या' गोष्टींचे दिसणे म्हणजे 'सिंगल' रेडी टू 'मिंगल' होण्याची लक्षणे समजा!

Dream Astrology: व्हॅलेन्टाईन्सच्या पार्श्वभूमीवर संपूर्ण जग प्रेमरंगात रंगलेले असताना काहीजण बिचारे स्वप्नंच रंगवत राहतात. अशा सिंगल लोकांना मिंगल होण्याची घाई असते, पण दूरवर कुठेही आशेचा किरण दिसत नाही. हीच आशा पल्लवित करण्यासाठी स्वप्न ज्योतिष शास्त्र तुमच्या स्वप्नांचा उलगडा करत आहे. स्वप्न ज्योतिष शास्त्रानुसार तुम्हाला स्वप्नात पुढील गोष्टी दिसत असतील तर लवकरच तुमचा प्रेमाचा शोध संपेल, असे म्हटले आहे. ती लक्षणे कोणती ते जाणून घेऊ.

>> स्वप्नात इंद्रधनुष्य दिसणे शुभ मानले जाते. वैवाहिक आयुष्य सुखाचे जाणार यासंबंधी ते संकेत आहेत. तसेच मोरपीस दिसणेदेखील शुभ असते. तुमच्या मोरपंखी आयुष्याची लवकरच सुरुवात होणार आहे, याची सूचना मिळते.

>> स्वप्नात आनंदाने स्वतःलाच नाचताना पाहणे, हे लवकरच लग्न ठरणार असल्याचे संकेत आहेत. असे स्वप्न सुखी दाम्पत्य जीवनाचे प्रतीकही मानले जाते. कारण आपण फक्त आनंदाच्या भरात नाचतो, त्यामुळे लवकरच असा आनंद तुमच्याही आयुष्यात येऊ शकतो.

>> वस्त्र किंवा सोने खरेदी करत असल्याचे स्वप्न पडले असता, श्रीमंत जोडीदार मिळण्याची दाट शक्यता असते. एवढेच नाही तर सोनेखरेदी हे संपन्नतेचे लक्षण आहे. तुमची काही आर्थिक येणी बाकी असतील तर लोक आपणहून पैसे आणून देतील किंवा आर्थिक सुबत्तेचा नवा मार्ग सापडेल.

>> स्वप्नात तुम्ही एखाद्या यात्रेत किंवा गर्दीमध्ये हरवून जात असाल, तर घाबरू नका तुमचा शोध घेणारा जोडीदार लवकरच तुमचा हात धरणार आहे. हरवण्याची स्वप्न तेव्हाच पडतात जेव्हा आपले मन अस्वस्थ असते. अशावेळी सावरणारी व्यक्तीही आयुष्यात येणार असल्याचे ते संकेत असतात.

>> विवाहेच्छुक मंडळींनी स्वप्नात कोणाची प्रेत यात्रा किंवा शव पाहिले, तर आयुष्यातील वाईट घटना संपुष्टात येणार असल्याचे लक्षण ठरते. त्यामुळे अशा स्वप्नांमुळे घाबरून जाऊ नका तर एक नवीन संधी तुमची वाट पाहत आहे असे समजा.

>> स्वप्नात तुम्ही स्वतःला कामात गढून गेलेले पहात असाल, तर लवकरच तुमचा स्वप्नपूर्तीचा काळ सुरु होणार आहे असे समजा. मनुष्याला स्थैर्य हवे असते, त्यासाठी तो दिवस रात्र धडपडत असतो, कामातून, प्रयत्नातून ते स्थैर्य मिळते व टिकतेसुध्दा!

>> स्वप्नात तुमचा बघण्याचा कार्यक्रम दिसत असेल पण बघायला आलेली व्यक्तीच आठवत नसेल, तर काळजी करू नका, तुम्हाला मनपसंत जोडीदारच मिळणार आहे.

आता वरील सर्व शक्यता वाचून तुम्हाला कोणती स्वप्नं पडतात याचा विचार करा पण त्यात अडकून राहू नका. लग्नाच्या गाठी ब्रह्म देवाने स्वर्गात बांधलेल्या आहेत. त्या कधी, कशा, कुठे बांधल्या जातील हे त्यालाच माहीती! स्वप्नांमध्ये मिळालेले संकेत आपल्याला दिलासा देण्याचे काम नक्की करतील. बाकी आपले चारित्र्य, व्यक्तिमत्त्व आणि स्वभाव यावरच आपला जोडीदार ठरणार आहे, हे लक्षात ठेवा.