महाशिवरात्री: तुमची रास कोणती? राशीनुसार करा उपाय; महादेव होतील प्रसन्न, मिळेल शुभ-लाभ!

Mahashivratri 2025 Astrology Remedies As Per Zodiac Signs: २०२५च्या महाशिवरात्रीला अनेक शुभ योग जुळून येत असून, राशीनुसार काही उपाय करणे, राशीनुसार नेमक्या गोष्टींचा महादेवाला अभिषेक करणे पुण्यफलदायी मानले गेले आहे. तुमची रास कोणती? जाणून घ्या...

Mahashivratri 2025 Astrology Remedies As Per Zodiac Signs: २६ फेब्रुवारी २०२५ रोजी महाशिवरात्री आहे. मराठी वर्षाची अखेर होताना येणारा मोठा सण-उत्सव म्हणजे महाशिवरात्री. संपूर्ण देशभरात महाशिवरात्री मोठ्या प्रमाणात साजरी केली जाते. वास्तविक पाहता प्रत्येक महिन्यात शिवरात्रीचे व्रत केले जाते. परंतु, माघ महिन्यातील शिवरात्र ही महाशिवरात्री म्हणून साजरी केली जाते. याबाबत अनेक मान्यता असून, याचे महत्त्व आणि महात्म्य अनन्य साधारण असेच आहे.

ज्योतिषशास्त्राचा विचार केल्यास या महाशिवरात्रीला अद्भूत असे योग जुळून येत आहेत. महाशिवरात्रीच्या दिवशी सूर्य, शनि आणि बुध या तीन ग्रहांचा कुंभ राशीत त्रिग्रही योग, राहु मीन राशीत, तसेच शुक्रही मीन राशीत आहे. मीन ही शुक्राची उच्च रास मानली जाते. गुरु ग्रह वृषभ राशीत आहे. मंगळ मिथुन राशीत आहे.

केतु कन्या राशीत आहे. महाशिवरात्रीला सर्वांत महत्त्वाचा मानला गेलेला निशीथकाल २६ फेब्रुवारी २०२५ रोजी रात्री १२ वाजून २७ मिनिटांपासून ते ०१ वाजून १६ मिनिटांपर्यंत असेल. एकूणच ग्रहस्थिती आणि जुळून येणाऱ्या शुभ योगात महाशिवरात्रीला राशीनुसार काही उपाय करणे शुभ मानले गेले आहे.

मेष: या राशीचा स्वामी मंगळ आहे. महाशिवरात्रीला शिवलिंगाला कच्चे दूध, दही आणि धोत्र्याचे फूल, फळ अर्पण करा. रक्त चंदनाचे त्रिपुंड लावावे. शिवाष्टकांचे पठण करावे. तसेच कण्हेरीचे फूल अर्पण करणे शुभ ठरू शकेल. लाल चंदन, गूळ अर्पण करावा.

वृषभ: या राशीचा स्वामी शुक्र आहे. महाशिवरात्रीला दह्याचा अभिषेक करावा. साखर, तांदूळ आणि पांढरी फुले अर्पण करावी. शक्य असेल तर शिवलिंगाला उसाच्या रसाने अभिषेक करावा. मोगऱ्याचे अत्तर, बेलपत्र आणि चंदन अर्पण करावे. शिव चालीसा पठण करावे किंवा श्रवण करावे.

मिथुन: या राशीचा स्वामी बुध आहे. महाशिवरात्रीला स्फटिकाच्या शिवलिंगाची पूजा करणे उत्तम मानले जात आहे. स्फटिकाचे शिवलिंग उपलब्ध नसल्यास मंदिरात पूजा करावी. सात प्रकारची फुले अर्पण करावीत. शिवाच्या स्तोत्राचे पठण करावे. तसेच शक्य असेल तर उसाच्या रसाने शिवाला अभिषेक करावा.

कर्क: या राशीचा स्वामी चंद्र आहे. महाशिवरात्रीच्या दिवशी तुपाचा अभिषेक करावा. शिवलिंगाला कच्चे दूध, जल, अष्टगंध, चंदन, पांढरी मिठाई अर्पण करा. शिवसहस्र नामावलीचे पठण करावे.

सिंह: या राशीचा स्वामी सूर्य आहे. महाशिवरात्रीच्या दिवशी फळांच्या रसाचा अभिषेक करावा. फुले, बेलपत्र अर्पण करावे. शिवमहिम्न स्तोत्राचे पठण करावे. शक्य असेल तर, गुळाच्या पाण्याने अभिषेक करावा. गूळ आणि तांदळापासून बनवलेली खीर अर्पण करावी.

कन्या: या राशीचा स्वामी बुध आहे. महाशिवरात्रीच्या दिवशी शिवलिंगाला कापूरमिश्रित पाण्याने अभिषेक करावा. शक्य असेल तर उसाच्या रसाचा अभिषेक करावा. बेलपत्रावर ठेवून नैवेद्य अर्पण दाखवा. शिव चालीसा पठण करावे किंवा श्रवण करावे. ॐ नमः शिवाय मंत्राचा १०८ वेळा जप करावा.

तूळ: या राशीचा स्वामी शुक्र आहे. महाशिवरात्रीच्या दिवशी पाण्यात काळे तीळ मिसळून शिवलिंगाला अभिषेक करावा. शक्य असेल तर सुगंधित तेलाचा अभिषेक करावा. पंचामृत तसेच श्रीखंडाचा नैवेद्य दाखवावा. बेलपत्र, मोगरा, अक्षता, चंदन अर्पण करा. पांढरी फुले अर्पण करावीत. तुपाचा दिवा लावावा. यथाशक्ती महामृत्युंजय मंत्राचा जप करावा. शिव चालीसा पठण करावे किंवा श्रवण करावे.

वृश्चिक: या राशीचा स्वामी मंगळ आहे. महाशिवरात्रीच्या दिवशी शिवलिंगावर मध आणि तुपाचा अभिषेक करावा. पंचामृताचा अभिषेक करावा. लाल रंगाच्या पदार्थांचा, लाल मिठाईचा नैवेद्य दाखवावा. रक्त चंदनाचे त्रिपुंड लावावे. फुले अर्पण करा. ॐ नागेश्वराय नमः' चा १०८ वेळा जप करावा.

धनु: या राशीचा स्वामी गुरु आहे. महाशिवरात्रीच्या दिवशी पाण्यात पांढरे तीळ मिसळून शिवलिंगाला अभिषेक करावा. पिवळी फुले अर्पण करावी. शक्य असेल तर हळदयुक्त दुधाचा अभिषेक करावा. महामृत्युंजय मंत्राचा यथाशक्ती जप करावा.

मकर: या राशीचा स्वामी शनी आहे. महादेव शनीचे आराध्य आहेत. महाशिवरात्रीच्या दिवशी शिवलिंगाला गहू अर्पण करावे. शक्य असेल तर नारळ पाण्याचा अभिषेक करावा. विधिवत पूजा करून ॐ अर्धनारीश्वराय नमः या मंत्राचा १०८ वेळा जप करावा. शंकराला अर्पण केलेले गहू गरजू गरिबांना दान करावे.

कुंभ: या राशीचा स्वामी शनी आहे. महादेव शनीचे आराध्य आहेत. महाशिवरात्रीच्या दिवशी पाण्यात काळे तीळ मिसळून शिवलिंगाचा अभिषेक करावा. शमी फुले अर्पण करावीत. भस्माचा त्रिपुंड लावावा. महामृत्युंजय कवच पठण करावे किंवा श्रवण करावे.

मीन: या राशीचा स्वामी गुरु आहे. महाशिवरात्रीला पिंपळाच्या झाडाखाली शिवलिंग बनवून पूजा करावी. शक्य असेल तर केशरयुक्त दुधाचा अभिषेक करावा. दही भाताचा नैवेद्य दाखवावा. शिवलिंगावर पिवळी फुले अर्पण करून ॐ अनंतधर्माय नम: या मंत्राचा यथाशक्ती जप करावा. तसेच ॐ नमः शिवाय या मंत्राचा १०८ वेळा जप करावा. - सदर माहिती सामान्य गृहीतके आणि ज्योतिषीय मान्यतांवर आधारित असून, यासंदर्भात तज्ज्ञ व्यक्तींचा सल्ला घेणे उपयुक्त ठरू शकेल, असे सांगितले जात आहे.